Myńdaǵan partııalasymyz apat bastalǵan kúnnen tótenshe jaǵdaıdyń bel ortasynda júr. Zardap shekken aımaqtarǵa kómek kórsetý boıynsha jedel shtab quryp, atqaratyn is-shara josparyn pysyqtady. Partııa tóraǵasy Serik Egizbaev aqparattyq jáne áleýmettik jelilerdegi óz resýrstary arqyly úndeý jarııalap, el basyna kún týǵan shaqta myńdaǵan partııalasymyzdy mańyzdy iske jumyldyra bildi.
Partııa belsendileri búginge deıin tasqyn sýdan zardap shekken 211 aýyldyq okrýg pen 5 qala ortalyǵynda apattyń aldyn alý jumystaryna tartyldy. Aqtóbe, BQO, Atyraý, Qostanaı, Aqmola oblysynyń tabıǵı apat qursaýynda qalǵan eldi mekenderine tonnalaǵan gýmanıtarlyq kómek joldady. Parlament Májilisindegi «Aýyl» partııasy fraksııasynyń depýtattary, Ortalyq apparat pen fılıaldarynyń qyzmetkerleri, partııa belsendileri tasqyn sýdan zardap shekken halyqqa kómek qolyn sozý maqsatynda ózderiniń bir kúndik jalaqylaryn aýdardy. Depýtattar tilsiz jaý zalal keltirgen aýyldardyń turǵyndarymen, sharýa qojalyqtary ıelerimen kezdesip, olarǵa jergilikti fılıaldar deńgeıinde kómek uıymdastyrý úshin qarǵyn sý qursaýynda qalǵan oblystarǵa arnaıy saparǵa shyqty.
О́ńirlik fılıaldardyń 900-den asa belsendi múshesi men Jastar qanatynyń 1 500 belsendisi apattyń aldyn alýǵa arnalǵan is-sharalarǵa qatysyp jatyr. Sonymen qatar partııa qataryndaǵy kásipkerler men fermerler bólgen 76 aýyr tehnıka Atyraý, BQO, SQO, Qostanaı, Aqmola oblysy aımaqtaryndaǵy aýyldarda tabıǵı apattyń aldyn alý jumystaryna tartyldy.
Bul jerde Jastar qanatynyń jumysyna toqtalmaı ketý múmkin emes. Olar Atyraý oblysynda Jambyl oblystyq fılıaly jınap, jóneltken 30 tonna gýmanıtarlyq kómekti muqtaj jandarǵa taratyp, Qurmanǵazy aýdanynda zardap shekkenderge arnap 14 qanatty kıiz úı tikti. Batys Qazaqstan oblysynda Shymkent qalasyndaǵy fılıal jınap, jóneltken 2 júk mashınasyndaǵy gýmanıtarlyq kómekti qabyldap alyp, ony jergilikti organdardyń tizimi boıynsha zardap shekken turǵyndarǵa taratty. Eki oblysta da bógetter turǵyzý úshin qaptarǵa qum toltyrýmen aınalysty. «Biz – birgemiz!» aksııasy aıasynda Soltústik Qazaqstan oblysyna 210 sý sorǵysh agregaty men elektrgeneratorlardy Astana áýejaıynan ushaqqa artýǵa qatysty. Soltústik Qazaqstanǵa qosymsha 15 tonna aýyzsý men 60 tonna azyq-túlik jınap jiberdi. Qazir atalǵan aımaqta 80-ge jýyq partııa volonteri áleýmettik mańyzy bar nysandarǵa, alys aýyl-qystaqtarǵa kómek kórsetip júr.
«Aýyl» partııasy tasqynnyń aldyn alý jáne qarǵyn sýdan zardap shekken turǵyndarǵa kómek kórsetýmen qatar, tasqynnan kelgen zalaldy júıeli negizde baǵalaıtyn komıssııalar jumysyna da belsendi atsalysyp jatyr. Aýyl máselelerin jaqsy biletin partııa músheleri, máslıhat depýtattary el aýmaǵynda qurylǵan 16 komıssııanyń quramyna endi.
Azamattarymyzdyń dál osyndaı birligi men bir-birine degen qamqorlyǵy, tabıǵı apattan japa shekken jandarǵa degen janashyrlyǵy kóńilge úmit, júrekterge jylylyq syılaıtyn jaıt. Keltirilgen zııannyń ornyn toltyrý da halqymyzdyń bir jaǵadan bas, bir jeńnen qol shyǵaryp áreket etýin qajet etedi. Sol sebepti de «Aýyl» partııasy tóraǵasynyń bastamasymen sý basqan úı-jaılardy qalpyna keltirý úshin Jastardyń qurylys otrıadtaryn qurý usynyldy. El kóleminde mundaı aýqymdy bastamany júzege asyrý úshin barlyq jas uıymdary men joǵary oqý oryndarynyń basshylary qazirden bastap uıymdastyrý jumystaryn qolǵa alsa ıgi. Mundaı ıgi is qıyndyqqa tap bolǵan otandastarymyz úshin naqty kómek, óskeleń jastarymyz úshin ómirlik tájirıbe ári ónegesi mol bastama bolmaq.
Qýanysh SEITJANOV,
«Aýyl» partııasy ortalyq apparatynyń basshysy
