203 394!

Bul – toqsan bestiń tórindegi taralymymyz

Táýelsizdik toıynyń qarsańynda «Ult uıasyndaǵy ulaǵat» degen jınaq shyǵarǵanbyz. Elbasymyzdyń Ulytaý tórindegi tarıhı suhbatynan týyndaǵan tolǵanystardyń basyn qosqan sol kitaptyń tusaýkeserinde jurtshylyqqa mynandaı jaıdy aıtqanbyz. Prezıdent suhbatyna alǵashqy únqosý pikirleri redaksııaǵa  ol áńgimeniń mátini gazet betine basylmaı turyp-aq túsip úlgerdi. Ulytaýdaǵy suhbat   «Habar» arnasynan 24 tamyzda keshki saǵat 22.00-de  berildi. Kún jeksenbi  bolatyn. Ertesine tańerteń jumysqa kelsek, suhbatqa ún qosqan eki  pikir ústelimizde jatyr. Taǵy eki pikir túske taman tústi. Bári elektrondy poshtamen kelgen. «Habardan» Elbasynyń áńgimesin tyńdaǵandaryn, keıinnen «Aqorda» saıtynan  oqyǵandaryn aıtady, razylyqtaryn bildiredi, oılaryn ortaǵa salady. Bul neni kórsetedi? Bul el halqynyń  eń dilger sózin aldymen «Egemen Qazaqstanǵa» aıtýǵa asyǵatynyn kórsetedi. Bul oqyrmannyń el gazetine senetinin, osynda jarııalanǵan sóz halyqqa barynsha keńinen taraıtynyn biletinin kórsetedi. Sol senim, mine, búgin bizdi taǵy bir bıikke shyǵaryp otyr. Osy jańa ǵana «Egemen Qazaqstan» basylatyn barlyq 15 baspahanadan eń sońǵy, túpkilikti málimetterdi aldyryp bittik. Búginnen bas­tap Astanadaǵy «ERNUR» medıa holdıngi – 11 144,  Almatydaǵy «Dáýir» – 18 099, Qaraǵandydaǵy «Qaraǵandy polıgrafııa» – 14 821,  Qostanaıdaǵy «Qostanaı polıgrafııa» – 4 220, Qyzylordadaǵy «Energopromservıs» – 18 945, Aqtaýdaǵy «Caspiy Print» – 6 315, Aqtóbedegi «Habar Servıs» – 10 488, Atyraýdaǵy  «Atyraý aqparat» – 13 413, Shymkenttegi «Ernur Print» – 38 371, Pavlodardaǵy «Dom pechatı» – 11 827, Petropavldaǵy «Polıgrafııa» – 7 909, Tarazdaǵy «Senim» – 16 840,  Oraldaǵy «Jaıyq Press» – 14 373, Taldyqorǵandaǵy «Ofset» – 4 015, О́skemendegi «Pechatnoe agentstvo Reklamnyı daıdjest» – 12 614 dana gazet baspaqshy. Barlyǵy – 203 394 dana! Oıymyzdaǵy bolypty. Ortamyz tolypty. Gazet 200 myńnan asatyn tamasha taralymyn saqtap qalypty. Tipti biraz dana qosyp ta alypty. Sonymen, el gazeti «Egemen Qazaqstannyń» 2015 jylǵy osy tuńǵysh nómiri eki júz úsh myń úsh júz toqsan tórt dana taralymmen basylyp otyr. Bul ótken jylǵy kórsetkishten (201 715 dana) 1 679 danaǵa artyq. Jańa jyldyń tabaldyryǵynda turyp biz el gazetine senimin taǵy kórsetken barsha oqyrman aǵaıynǵa aq alǵysymyzdy aıtamyz. Biz baǵyndyrǵan bul bıiktiń astarynda eń aldymen el halqynyń eldik sanasynyń joǵarylaı túsýi, biz dáıim nasıhattaýdan tanbaıtyn Elbasy saıasatyn qoldaýy, memlekettik til mártebesiniń jyldan-jylǵa ornyǵýy,  jurtshylyqtyń ál-aýqatynyń artýy turǵanyn jaqsy túsinemiz. «Memleket gazetiniń memlekettik saıasatty memlekettiń kómegimen atqaratyny ábden tabıǵı jaı» dep jaqynda ózimiz jazǵanymyzdaı, gazetke jazylym naýqanyna janashyrlyq tanytqan barsha azamattarǵa da alǵysymyzdy aıtamyz. Toqsan bes jastyń tórine kóterilgen «Egemen Qazaqstan» aldaǵy kezde de eldiktiń jarshysy, memlekettiliktiń minberi, jasampazdyqtyń jylnamashysy mıssııasyn abyroımen atqara beredi dep sendiremiz. Jańa jylda jazar jaqsylyǵymyz kóp bolsyn! Saýytbek ABDRAHMANOV.