О́skemende jańa jyl merekesine oraı jármeńke uıymdastyryldy

О́SKEMEN. 1 qańtar. Shyǵys Qazaqstan oblysy basshylyǵynyń uıytqy bolýymen О́skemendegi «Fresh market» fermerlik gastronomynyń janynda Tarbaǵataı aýdanynyń azyq-túlik jármeńkesi ótti. Bul týraly egemen.kz tilshisi habarlady. Mal sharýashylyǵymen áıgili tarbaǵataılyqtar jármeńkege 47 bas iri qara, 83 bas qoı, 1 túıeniń etin ákelgen eken. Sondaı-aq, Zaısan kólinen Tuǵyl aýylynyń turǵyndary aýlaǵan bir jarym tonna balyq jetkizildi. Onyń syrtynda 50 lıtr qymyz, 50 kılodan astam sary maı, qurt-irimshik, aıran sııaqty sút ónimderi de sórege qoıyldy. Aıta ketken abzal, jármeńkedegi azyq-túlik bazar narqyna qaraǵanda 30-40 paıyzǵa deıingi tómen baǵamen satyldy. – Jármeńkede sıyr eti 700 teńgeden satylyp jatyr. Bazarda 1200-1300 teńgege satylatynyn eskersek, bul ájeptáýir tómen baǵa. Qymyzdyń lıtri 300 teńgeden satyldy. Bazarda kem degende 600 teńgeden baǵalanady. Sondyqtan, munda barlyq taýardy halyq birden satyp alyp ketti, – deıdi qala turǵyny Nadejda Vasılevna. Shynynda, tań atpaı jármeńkege aǵylǵan jurttyń qarasy qalyń edi. Tús aýa fermerler barlyq ónimderin satyp bolǵandaryn aıtty. – Búgingi jármeńkede 22 mıllıon teńgeniń ónimi satyldy. Oǵan 17 aýyldyq okrýg pen 54 sharýa qojalyǵy qatysty, – dedi Tarbaǵataı aýdanynyń ákimi Dildábek Orazbaev. Dýman Anash. Derek: egemen.kz. Sýret: Altaynews.kz.