Sýretti túsirgen – Jeńis Ysqabaı
«Baıaǵyda ájemiz jaqsy kórgen adamyńmen áńgimeń bitpeıdi», deýshi edi. Ony eseıe kele baǵamdadyq qoı. Halyq aqyny Muhtar Shahanov «Jubaılar bar áńgimesi taýsylǵan, Al mahabbat – taýsylmaıtyn áńgime» dep jyrǵa qosqanda, kóńil bir tolqyǵan edi. Budan artyq ne aıtýǵa bolady...
Ras, sáýir aıy kóktemniń eń mereıli mezeti, bórtegúl gúldep, sezim oıanar shaq. Osy rette oblys ákimdigi súıgen arýyna sóz salýǵa nıetti 15 jigittiń tilegin oryndady. Tipti júzdegen otbasyn B.Rımova atyndaǵy Taldyqorǵan drama teatryna shaqyryp, «Qozy Kórpesh – Baıan sulý» kúnine arnalǵan «Sezim úshin…» atty konsert uıymdastyryp berdi.
Osy iske muryndyq bolǵan oblys ákiminiń orynbasary Marlen Kólbaev saltanatty keshtiń kýási bolyp, jastarǵa lebizin bildirdi.
«Biz – dástúrge baı halyqpyz. Qozy men Baıannyń taǵdyry emes, bir-birine degen rııasyz mahabbaty – jastarǵa nasıhat. 15 jupqa qazaǵymyzdyń jaqsy da úlgili otbasysyna aınalsyn dep tilek bildiremiz. Olardyń endi qatelesýge quqylary joq. Sebebi osylaı kópshiliktiń aldynda bir-birine sóz salyp, bir-birine mahabbatyna berik bolamyz dep ýáde bergennen keıin, sol ýádelerinde turý kerek dep oılaımyz. Jaqsy otbasy bolsyn. Qazaǵymyzdyń tárbıeli, ónegeli otbasylary kóbeıe bersin», dedi M.Kólbaev.
Saltanatty jıynda teatr ártisteri jyrdan shashý shashyp, kóńilge jylylyq uıalatar shaǵyn qoıylym qoıdy. Sondaı-aq 15 jup sahna tórinde bolashaq jaryna sezimin bildirdi. otaý qurýǵa bekingen barlyq jas otbasyna gúl shoqtary berilip, «Taptym-aý seni» lırıkalyq dramasyna bılet tabystaldy. Solardyń biri – B.Syrttanuly atyndaǵy № 25 orta mektebiniń ustazy Beıimbet Sovetbek.
«Men ózim № 25 orta mektepte jumys isteımin. Al men unatqan qyz qaladaǵy № 9 bilim ordasynda qyzmet etedi. 15-i kúnin arnaıy belgiledim. Sol mekteptiń muǵalimderimen aldyn ala kelisip te qoıdym. Ǵashyǵym sol kúni ashyq sabaq ótkizip jatqan sátte sóz saldym. Ol meni kórgen kezde qatty tańǵaldy. Usynysymdy osylaı jasadym», deıdi B.Sovetbek.
Ǵashyqtar kúni qarsańynda tuńǵysh ret 15 juptyń tilegi oryndalǵan merekelik kesh Jetisý jurtynyń ystyq yqylasyna ıe boldy. Jastar is-sharany uıymdastyrǵan jandarǵa alǵaýsyz aq tilegin aqtardy.
Jetisý oblysy
