Foto: Shutterstock
Qazaqstannyń soltústiginde egis mamyr aıynyń ortasynda bastalady. Aldyn ala boljamǵa sáıkes, bul aı ystyq bolady. Máselen, respýblıkanyń basym bóliginde ortasha aılyq aýa temperatýrasy normadan 1-2 gradýsqa joǵary bolady dep boljanyp otyr.
«Respýblıkanyń qıyr batysynda jaýyn-shashyn mólsheri ortasha klımattyq kórsetkishterden asyp túsedi dep kútiledi. Ulytaý, Qyzylorda, Qostanaı jáne Aqmola oblystarynda, Túrkistan, Jambyl, Qaraǵandy oblystarynyń soltústik-batysynda jaýyn-shashyn mólsheri az bolady», dedi Loenko brıfıng barysynda.
Erigen qar sýynyń kóp mólsherin eskere otyryp, astyqty aımaqtardyń kópshiliginde egis kezeńinde topyraqtaǵy ylǵaldyń ońtaıly qory kútiledi.
«Qyzylorda oblysynyń Qarmaqshy aýdanynda atmosferalyq qurǵaqshylyq, sonymen qatar jaýyn-shashyn tapshylyǵy jáne joǵary temperatýra kútiledi», dep qosty departament basshysy.
Esterińizge sala keteıik, bıyl sınoptıkter Qazaqstannyń basym bóliginde joǵary jáne tótenshe órt qaýpi saqtalatynyn eskertti. Mamyr aıynyń ózinde elimizdiń ońtústiginde aýa temperatýrasy 40 gradýstan joǵary bolady.
