Kókshetaý qalasyna jańa ákim taǵaıyndaldy

ASTANA. 6 qańtar. Aqmola oblysynyń basshysy Sergeı Kýlagınniń ókimimen jáne qalalyq máslıhat depýtattary kelisimi negizinde Marjyqpaev Ermek Boranbaıuly Kókshetaý qalasynyń ákimi bolyp taǵaıyndaldy. Bul týraly «QazAqparat» habarlady. Ermek B Marjyqpaev 1969 jyly týǵan. Joǵary bilimdi. 1994 jyly S.Seıfýllın atyndaǵy Aqmola memlekettik pedagogıkalyq ınstıtýtyn tarıh páni muǵalimi mamandyǵy boıynsha, 2001 jyly «Turan» ýnıversıtetin zańger mamandyǵy boıynsha, 2009 jyly Kókshetaý ýnıversıtetin qarjy baklavry mamandyǵy boıynsha aıaqtaǵan. Eńbek jolyn 1991 jyly Astana qalasynyń №29 orta mektebiniń dene shynyqtyrý pániniń muǵalimi, boks bapkeri bolyp bastady. 1993 jylǵy qańtardan bastap 1994 jylǵy qarasha aralyǵynda Shýche aýdany Býrabaı kentiniń №7 orta mektebinde tarıh pániniń muǵalimi bolyp jumys istegen. 1994 jylǵy qarasha men 1995 jylǵy maýsym aralyǵynda Shýche qalasy «Shonaı» shaǵyn kásiporynynyń dırektory qyzmetinde boldy. 1995 jylǵy maýsymnan bastap «Bereke-Býrabaı» JShS bas dırektory qyzmetin atqardy. 2008 jylǵy tamyzdan bastap Arshaly aýdanynyń ákimi, 2012 jylǵy sáýirden bastap 2013 jylǵy qyrkúıek aralyǵynda Zerendi aýdanynyń ákimi boldy. Keıin, 2014 jylǵy maýsymǵa deıin Aqmola oblysy ákiminiń orynbasary qyzmetin atqardy. Osy taǵaıyndaýǵa deıingi qyzmet orny – Prezıdent ákimshiligi memlekettik baqylaý jáne aýmaqtyq-uıymdastyrý bóliminiń memlekettik ınspektory. Joldybaı Bazar. Derek, sýret: «QazAqparat».