Soltústik Qazaqstan oblysyndaǵy «Abylaı han rezıdensııasy mýzeı kesheninde» uly hannyń zamanyna qatysty kóptegen tarıhı jádiger saqtalǵan. Azattyq kúrestiń bahadúri, qazaqqa uly han bop ótken Abylaı hannyń muralary Ertistiń Pavlodar óńirinde alǵash ret kórsetildi.
Kóshpeli kórmeni bastap kelgen «Abylaı han rezıdensııasy mýzeı kesheniniń» dırektory Aıan Sadaev mekemede jalpy sany 500-den astam eksponat baryn jetkizdi.
«Abylaı zamanyna qatysty soǵys qarý-jaraǵy, tarıhı qujattar, etnografııalyq buıymdar kóp. Búgingi kóshpeli kórmege solardyń negizgilerin ǵana ákelip otyrmyz. Bul jádigerlerdiń kóbi sol zamannyń úlgisimen jańadan jasalǵan buıymdar ekenin baıqap otyrǵan bolarsyzdar. Qalamyzda Vıktor Javoronkov esimdi sheber azamat bar. Oǵan tapsyrys beremiz. Usta buıymdy jasamas buryn onyń tarıhı negizin zerttep, maǵlumattar jınaıdy. Nátıjesinde, óte keremet týyndylar jasap shyǵardy. Al keıbir jádigerlerdi «Mýzeıge syılyq» aksııasy aıasynda jergilikti jurtshylyq ákelip tapsyrdy», deıdi ol.
Kórmede Abylaıdyń aq úıiniń úlgisi, hannyń mór saqınasynyń kóshirmesi, zulpyqar qylysh, qazaq batyrlarynyń saýyt-saımany men semser, naıza, shoqpar, qylysh, aıbalta, kúrzi, akınak, sıraqty myltyq sııaqty soǵys quraldary, sol kezeńdegi dıplomatııalyq hattar men arhıvtik qujattardyń kóshirmeleri, taǵy da basqa kóptegen jádiger usynyldy.
PAVLODAR
