Mundaı mádenı is-shara oblystyq mádenıet, arhıvter jáne qujattama basqarmasynyń qoldaýymen alǵash ret ótip otyr. Oblystyq deńgeıde uıymdastyrylsa da, 61 qatysýshydan ótinim túsken. Usynylǵan aýdıoertegiler arasynda qazaq, orys halqynyń ertegileri, sondaı-aq avtorlyq ertegiler bar.
«Kórý qabileti buzylǵan balalarǵa arnalǵan «Ertegiler álemi» atty oblystyq aýdıoertegiler baıqaýynda qazylyq ettik. Baıqaýǵa kelip túsken materıaldardyń barlyǵyn tyńdap, uıymdastyrýshylar usynǵan baıqaý ólshemderine saı baǵalap shyqtyq. Osy jumysty atqarý barysynda qatysýshylardyń eńbekqorlyǵyna, jaýapkershiligine, sheberlikterine súısindik. Aýdıoerteginiń mátinimen qosa daýystarynan tyńdarmandarǵa degen ystyq yqylas, aýyz ádebıetine degen zor súıispenshilik baıqalyp turdy. Kórý qabileti buzylǵan balalardyń ereksheligin esepke ala otyryp, ertegi oqýǵa qoıylatyn talaptardy saqtaýǵa tyrysqan. Qatysýshylardyń deni jalpy bilim beretin mektep muǵalimderi men kitaphanashylar boldy. Jeńimpazdardy marapattaý saltanatyna kórermen retinde Qaraǵandy oblystyq zaǵıp jáne nashar kóretin azamattarǵa arnalǵan arnaıy kitaphananyń turaqty oqyrmandary keldi. Olar bul baıqaýdyń ózderiniń aýdıtorııasyna laıyqtap uıymdastyrylǵanyna rızashylyqtaryn bildirdi», deıdi Qazaqstan Jazýshylar odaǵynyń múshesi, Bóketov atyndaǵy Qaraǵandy zertteý ýnıversıtetiniń aǵa oqytýshysy, qazylar alqasynyń tóraǵasy Saltanat Keńesbekova.
Bul oblystyq baıqaýǵa Qaraǵandy, Temirtaý, Shahtınsk, Saran, Abaı, Balqash, Prıozersk qalalary men Buqar jyraý, Shet, Osakarov, Aqtoǵaı, Nura aýdandarynan kóp jumys túsken. Qatysýshylardyń deni Aqtoǵaı men Nura óńirinen. Sonymen, «О́nerdiń kúshi» atty qazaq halyq ertegisin aýdıoǵa sheber taspalaǵan nuralyq kitaphanashy Gúlimaı Ahmetbekova birinshi oryn aldy.
«Baıqaýǵa ertegi tańdaǵanda kóp oılandyq. Kóp oqyla bermeıtin, erekshesin tańdaýdy jón sanadyq. Sóıttik te, tańdaýymyz «О́nerdiń kúshine» tústi. Ýaqytyn da uzartyp almaý kerek boldy. Asyǵys ta oqymaý kerek. Bastysy, ertegini tyńdaǵan balanyń júregine áser etý, erekshe ıirimmen jetkizýdi kózdedik. Qazylar alqasy bizdiń jumysymyzdy úzdik dep tanyǵanyna bir qýanyp, bul ertegilerdiń aýdıokitapqa jınaqtalatynyn estip eki qýandyq», deıdi baıqaý jeńimpazy Gúlimaı Ahmetbekova.
Al ekinshi oryndy «Erinshek adam» aýdıoertegisimen aqtoǵaılyq Álı Seıdiǵalı, úshinshi oryndy Qaraǵandy qalasynan «Skazkı dlıa Sofıı-Vesennyı veterok» («Prıdýmkı ot Alınkı» serııasynan) aýdıoertegisimen Natalııa Morozova ıelendi.
Munymen qosa, «Úzdik aýdıoqoıylym» atalymynda «Altyn saqa» shyǵarmasy úshin Jannur Alıasqarova, «Lýchshıı chtes» atalymynda «Baı-mýzykant ı Aldar-Kose» ertegisi úshin Roman Ten yntalandyrý syılyǵymen marapattaldy. Júldegerlerge dıplom men qarjylaı syılyq berildi.
Mundaı ıgilikti is-shara endi dástúrge aınalmaq. Bir qyzyǵy, uıymdastyrýlar alqasy jumystardy qabyldaý kezinde baıqaýǵa Batys Qazaqstannan ótinim túskenin keziktiripti. Muny eskergen uıymdastyrýshylar keler jyly respýblıkalyq deńgeıde ótkizemiz dep otyr.
Qaraǵandy oblysy
