Anatolıı Vasılevıchtiń birlestik tizginin ustaǵanyna bir jyldaı ǵana ýaqyt boldy. Deıturǵanmen ol uıymnyń jumysyna 28 jyldan beri belsendi aralasyp, ortalyq horynda án salyp keledi. Assambleıanyń, birlestiktiń qyr-syryn bes saýsaǵyndaı jaqsy biletindikten, jergilikti ýkraınder ony birden qoldap, saılaǵan. Áriptesteri ánshilik ónerin jaqsy baǵalaıdy. 1996 jyldan bastap qoǵamdyq birlestiktiń mádenı ómirine belsene aralasyp, túrli mádenı keshter, arnaıy festıvaldarǵa qatysady. Anatolıı Neýmyvako 150-ge jýyq ýkraın ánderin hormen de, jeke ózi de oryndaıdy. Hor músheleri ýkraın ánderinen bólek, Abaıdyń, basqa da qazaq sazgerleriniń ánderin biledi eken.
– Bizde Ulttyq jańǵyrý mektebi bar, ondaǵy eki synypta balalarǵa ýkraın halqynyń tili úıretilip, mádenıeti tanystyrylady. Ekinshi jaǵynan ol jerde qolónermen, ulttyq buıymdardy ázirleýmen de aınalysýǵa múmkindik bar. «Qoǵamdyq kelisim» mekemesiniń qoldaýymen ádemi kıimder, kostıýmder tigilip, merekelik is-sharalarǵa úzbeı qatysamyz. Jastar ortalyǵy negizinen konserttik baǵdarlamalarǵa jıi barady. Buǵan qosa Analar keńesi, Aqsaqaldar keńesi jumys istep tur. Ondaǵy múshelerimiz uzaq ýaqyttan beri jergilikti Assambleıamen, Dostyq úıimen tyǵyz baılanysta. Mektepterge jıi shyǵyp, halqymyzdyń tarıhy, mádenıeti, turmys-tirshiligi, salt-dástúri, ádet-ǵurpy týraly jas urpaqqa dáris oqımyz. Osynyń barlyǵy elimizdegi halyqtar erkindiginiń, aýyzbirshilik pen yntymaǵymyzdyń qaımaǵy buzylmaýynyń aıǵaǵy, – deıdi aqsaqal.
Qazirgi ýaqytta birlestiktiń Ekibastuz qalasynda, birneshe aýdan, aýylda fılıaldary bar. Merekelerde oblystyq uıym olarǵa, al jergilikti óner ujymdary munda qonaqqa kelip, konsert qoıady.
Anatolıı Vasılevıch elimizdiń jastary jańashyl ári bilimqumar ekenine toqtaldy. Aıtýynsha, keńes dáýirindegi jastardyń qundylyǵy, ómir salttary múlde bólek edi. Jas azamattar ulttar men halyqtar arasyndaǵy dostyqtyń nyǵaıýy beıbitshilikke negiz bolatynyn jaqsy túsinedi. Sondyqtan osy qundylyqty joǵary baǵalaıtyndary baıqalady. Birlestiktiń jastar qanaty aqsaqaldarǵa úlken qolǵanat bolyp otyr. Túrli is-sharalardy birlesip atqaryp, qaıyrymdylyq sharalaryna eldiń aldy bolyp júgiredi. Jýyqta oblys ortalyǵyndaǵy «Samal» ońaltý ortalyǵyna baryp, emdelýshilerge syı-sııapat jasady. Buǵan qosa Ýkraınadan qonys aýdaryp kelgen azamattarǵa, eldegi tabıǵı apattardan zardap shekkenderge kómek kórsetýde eresektermen birge tize qosyp úles qosyp júr. Jastardyń mundaı ıgi isterge jumylýyna Ulttyq jańǵyrý mektebiniń ustazy Tatıana Golovchýk, ata-ana Tatıana Saenko, taǵy basqa belsendi jandar sebepker.
A.Neýmyvakonyń negizgi mamandyǵy – orys tili pániniń muǵalimi. 48 jyl ustazdyq etip, mektep dırektory laýazymyn da abyroıly atqarǵan. Onyń atasy men ájesi sonaý HVIII ǵasyrdyń sońynda qazaq jerine kóship kelip, qazirgi Ertis aýdany aýmaǵyna taban tiregen. Sol ýaqyttan beri áýlet músheleri qazaq jerindegi ult-azattyq kóterilisti, tóńkeristi, ashtyq alapaty men stalındik qýǵyn-súrgindi, Ekinshi dúnıejúzilik soǵys ýaqytyndaǵy qıyndyqtardy qazaqtarmen birge bastan ótkerdi. Aqsaqal jubaıy Valentına Nıkolaevna ekeýi eki ul, bir qyz tárbıelep ósirip, búginde nemereleriniń qyzyǵyna kenelip otyr. Ýkraınany tarıhı otany sanaǵanymen, urpaǵy Qazaqstandy mekendep qalýyn tileıdi.
«Qazaq halqynyń meıirimi men jomarttyǵy, beıbitsúıgish qasıetiniń arqasynda elimizdegi birlik pen yntymaqqa syzat túspeıtini anyq. Al Assambleıa sııaqty qoǵamdyq ınstıtýt óziniń qajettiligin áldeqashan dáleldep qoıǵan. Eń bastysy, munda túrli ulttar mádenıetiniń toǵysy bar. Mundaı jerde halyqtardyń bir-birine degen súıispenshiligi men qurmeti arta túsedi. Máselen, bizdiń birlestik ózge ult ortalyqtarymen únemi baılanysta. Túrli saltanatty is-sharalarda, merekelik konsertterde birlesip óner kórsetemiz. Aldaǵy ýaqytta bul baǵyttaǵy jumystarymyz jalǵasa beredi, sebebi bul bizdi biriktiredi», deıdi abyroıly aqsaqal.
Pavlodar oblysy
