Foto: Aqorda baspasóz qyzmeti
Memleket basshysynyń aıtýynsha, jınalǵan qarajat eldi mekenderdi qalpyna keltirýge jumsalady. Sondaı-aq apattyń kesirinen qıyn jaǵdaıǵa tap bolǵan azamattarǵa kómek retinde beriledi.
«Eshkim eleýsiz qalmaıdy. Memleket shyǵyndy túgel óteıdi. Tasqynnyń zardabyn joıý úshin bıýdjet shyǵystary qysqartylatyn boldy. Memleket qarjysyn qatań únemdeý rejımi engiziledi», dedi Memleket basshysy.
Sondaı-aq Prezıdent: «Árıne, mańdaı termen tirnektep tapqan dúnıe-múlikti bir sátte joǵaltý ońaı emes. Men muny túsinemin. Zardap shekken azamattarǵa taǵy da aıtamyn: búkil halyq – sizdermen birge. Kóp uzamaı barshańyz qalypty ómirge qaıta oralasyzdar. Ol úshin memleket bárin jasaıdy», dedi.
Qasym-Jomart Toqaev tasqyn bastalǵannan beri Qazaqstan halqy Assambleıasy belsendi ári úılesimdi jumys istep jatqanyna búkil el kýá ekenin atap ótti.
«Jurtqa jan-jaqty kómek berý úshin dereý Assambleıanyń respýblıkalyq jáne aımaqtyq shtabtary quryldy. «Júrekten júrekke» degen aýqymdy aksııa júrgizilip jatyr. Apat aımaqtaryna 1500 tonnadan astam azyq-túlik jáne eń qajetti taýarlar joldandy. Onyń jalpy somasy shamamen 770 mıllıon teńge boldy», dedi Prezıdent.
Memleket basshysynyń sózinshe, sý tasqynymen kúreske etnomádenı birlestikterdiń 12 myńǵa jýyq ókili qaıyrymdylyq jáne gýmanıtarlyq kómek jınaýǵa jumylǵan. Sondaı-aq jurtty qaterden habardar etýge jáne qaýipsiz jerge kóshirýge atsalysty.
«Munyń bári – ózara janashyr jáne tileýles bolýdyń aıqyn kórinisi. Men Batys Qazaqstan, Soltústik Qazaqstan, Qostanaı oblystaryna arnaıy bardym. Kezdesý kezinde jurtshylyq Assambleıa múshelerine zor rızashylyq bildirdi», dedi Memleket basshysy.
