Atalǵan festıvalda «Jer kúni – Umaı» halyqaralyq meıramyna arnalǵan velosherý uıymdastyrylyp, aǵash kóshetteri otyrǵyzyldy. Odan keıin aýmaqty qoqystan tazartý jumystary qolǵa alyndy. Jalpy, ekofestıvaldyń maqsaty – ekologııalyq qundylyqtar men mádenı murany nasıhattaý. Odan bólek, Jetisý óńirinde ekologııalyq týrızmdi damytýǵa baǵyttaldy.
Igilikti is-sharaǵa qala ákimi Ernat Bázil qatysyp, EKO festıvaldy uıymdastyryp jatqan árbir janǵa, tabıǵat janashyrlary men eriktilerge alǵysyn bildirip, aǵash otyrǵyzý rásimine qatysty. Sonymen qatar oblystyq mádenıet, arhıv jáne qujattama basqarmasy jáne basqarmaǵa qarasty mekeme qyzmetkerleri de belsene qatysyp, aǵash kóshetterin egýge járdemdesti. D.Raqyshev atyndaǵy fılarmonııa ánshileri konserttik baǵdarlamamen jınalǵan qaýymnyń kóńilin kóterdi.
Ekofestıval aıasynda qatysýshylarǵa Qyzyl tas – Tasbaqa tas petroglıfterine ekskýrsııa jasalyp, mádenı orynnyń tarıhy aıtyldy. Ashyq aspan astynda óńir qolónershileriniń kórmesi qoıyldy. Artynan túrli baıqaýmen jalǵasyn taýyp, jınalǵan qaýymdy bir serpiltip tastady.
Aıta keteıik, jıyn aıasynda Tasbaqa tas aýmaǵyna myńnan asa adam jınalyp, 200 dana aǵash kósheti otyrǵyzyldy. Qazir óńirde «Taza Qazaqstan» respýblıkalyq ekologııalyq aksııasynyń aıasyndaǵy «Jasyl aımaq» aptalyǵy bastaldy. Bir kúnde oblys kóleminde 1400-den asa aǵash otyrǵyzyldy.
Oblystyq energetıka jáne TÚKSh basqarmasynyń málimetine súıensek, kógaldandyrý sharalary oblystyń barlyq aýdan-qalasynda belsendi júrgizilip jatyr. Búgingi bir kúnniń ózinde 1401 túp aǵash otyrǵyzylǵan. Olar negizinen japyraq tuqymdas, qylqanjapyraqty jáne jemis aǵashtary.
Máselen, Kerbulaq aýdany Saryózek aýlynda turǵyndar 850 túp qaraǵaı ekse, Aqsý aýdany Esebolatov, Qarasý aýyldarynda barlyǵy 150 túp alma aǵashy otyrǵyzyldy. Sol sııaqty Sarqan aýdany Almaly, Amangeldi aýyldyq okrýgterinde shyrsha, alma, bórtegúl aǵashtary egildi. Budan ózge aýdan-qalanyń barlyǵy da aptalyqqa belsendi qatysyp, kóshet otyrǵyzýmen qatar aǵashtardyń túpterin aǵartyp, parkter men skverlerdiń, mekeme-uıymdardyń aýmaǵyna tazartý jumystaryn júrgizdi. Bul jumystar apta boıy jalǵasady.
Aıta keteıik, óńir boıynsha «Qazsýshar» fılıaly bıyl 173,1 shaqyrym kanaldy tazartyp, 54 gıdrotehnıkalyq qurylysty jáne 10 gıdroposty jóndeýdi josparlap otyr. Búginde kanaldyń 40 shaqyrymy tazartyldy, 1 gıdrotehnıkalyq nysan salyndy jáne 4-eýi jóndeldi.
Sonymen qatar 1060 sharýa qojalyǵymen sý berý týraly kelisimsharttarǵa qol qoıyldy. Sharýalar 20 myń gektarǵa jýyq alqapty sýarý úshin 174 mıllıon tekshe metr sý alady.
Jetisý oblysy
