Poshta qyzmeti qaıtse jaqsarady?

degen saýal tóńireginde oı-pikirler almasqan aımaqtyq alqaly  jıynda tyń bastamalar men qanatqaqty jobalar jóninde de keńinen áńgimelendi «Qazposhta» AQ qalyptasý, reformalaý joldarynan sátti ótip, búgingi kúni elimizdiń turǵyn­daryna poshtalyq-qarjylyq qyzmettiń keń túrin kórsetetin jáne qýatty fılıaldyq jelilerdi birik­tiretin ulttyq operatorǵa aınalyp otyr. Kompanııa Elba­sy qoıǵan talaptarǵa sáıkes poshtanyń kópqyrly qyzmetin odan ári jetildire túsip, qarjy­lyq ınstıtýtqa aınaldyrý úrdi­sin jedeldetýdi negizgi baǵdar etken. Osyǵan oraı «Samuryq-Qazyna» ulttyq ál-aýqat qory» AQ pen «Qazposhta» AQ bas­qar­masy Memleket basshysy iske qosqan «Transformasııa» baǵdarlamasyn júzege asyrýǵa belsene kiristi. Bul úrdis korpo­ra­tıvti basqarýdyń jańa deńgeıin qalyptastyrýdy, básekege qabiletti jáne álemniń úzdik tájirıbesin qoldaný arqyly jumystyń qaǵıdalaryn qaıta qaraý esebinen qarjylyq jáne operasııalyq tıimdilikti kóterýdi ditteıdi. Osy talaptar údesinen shyǵýdy basty murat etken «Qazposhta» AQ SQOF qyzmet kórsetýdiń osy zamanǵy ádisteri men standarttaryn ıgerý jolyn talmaı izdestirip keledi. San-salaly jumysta aýyldyq aýmaqtardy, shaǵyn jáne orta bıznestiń, zeınetkerlik, tólem kartishkeleriniń ulttyq bank­aralyq júıeleri, ınternetke baǵdarlanǵan qyzmetter bir-biri­men tyǵyz birlikte úılestirilgen. Onyń ústine AQ eldi mekenderde eńbekaqy men zeınetaqy tóleý, tólemderdi qabyldaý, plastıkalyq kartalardy shyǵa­rý jáne taǵy basqa banktik qyzmetterdiń túrlerin iske asyratyn birden-bir uıym ekenin eskersek, jergilikti bólimshelerge artylar jaýapkershiliktiń eselene túseri anyq. «Qazposhta» aksıonerlik qoǵamynyń basqarma tóraǵasy Baǵdat Mýsınniń jetekshiligimen Qyzyljar óńirinde ótken kósh­peli aımaqtyq keńeske kompanııa­nyń ózge de basshylyq quramy, Aqtóbe, Qostanaı, Qaraǵandy, Soltústik Qazaqstan oblystary­nan jergilikti fılıal jetekshi­leri, respýblıkalyq, oblystyq, aýdandyq basylym men bas­pa ókilderi qatysyp, aýyldyq jerlerdegi poshta baılanysyn jetildirý, tasymaldaý jıiligin kóbeıtý, bólimshelerdiń jumysyn jandandyrý, ozyq ádis-tásilderdi engizý, taǵy basqa máseleler tóńireginde keńinen talqylady. Jıyn bastalar aldynda már­te­beli qonaqtar suryptaý jáne tasymaldaýǵa arnalǵan ýchaskede ornatylǵan avtomatty je­li jumysymen tanysty. Jańa joba­nyń artyqshylyǵy sol, ol merzimdi baspasózdi suryptaý ýaqytyn qysqartýǵa, eńbek shyǵynyn azaıtýǵa, jetkizý sapasyn jaqsartýǵa múmkindik berdi. Dóńgelek ústeldi Baǵdat Batyrbekuly júrgizip, «Samuryq-Qazyna» ulttyq ál-aýqat qory quramyna enetin kompa­nııa aldynda turǵan keleli mindet­terge jan-jaqty toqtaldy. Ol jınalǵandar esine «Egemen Qazaq­stan» gazetinde jarııalanǵan suhbattardy (26 qarasha «Trans­formasııa­laý: tyń talaptar turǵysynan», 19 qyr­­kúıek «Kazpochta túıtkildi másele­ler túıi­nin qalaı sheshpek?») eske salyp, Trans­formasııa baǵdarlamasy, onyń sheńberinde atqarylyp jatqan aýqymdy jobalar týraly aıtyp berdi. Eń bas­ty problema basylymdar men hat-habar­lar­dy aýyldyq jerlerge ýaqytyly jetkizýge tireledi. Jasyratyny joq, hat-habarlardyń, gazetter­diń keshiktirilýi jaıly shaǵymdar jıi túsedi. Osy bir olqylyqty boldyrmaý úshin tasymaldy ap­tasyna eki ret, odan úsh ret uıymdastyrýdy ditteıtin qanat­qaqty jobalardyń tıimdiligi­ne oń baǵa berdi. Aldaǵy maq­sat – aýyldardaǵy baılanys bólimshelerin jabý emes, kerisin­she, saqtap qalý, jumysyn jandandyrý. Odan ári gazetterge ınternet arqyly ja­zy­lý, qalalarda PIK-termen qoıan-qoltyq qarym-qatynasty retke keltirý, 2017 jylǵa qaraı tómengi jalaqyny 30 paıyzǵa kóbeıtý mindetteri turǵanyn aıta kelip, «Poshta týraly» zań jobasy ázirlenip jatqanyn, poshta jumysyn jan­dan­dyrýǵa baılanys­ty naqty usynystar engizilgenin jetkizdi. Taǵy bir mańyzdy joba «Qazposhta» júıesi arqyly elektrondy satý múmkindigin damytý bolyp tabylady. Jıynda SQOF dırektory Erik Nura­qaev atqarylǵan jumystarmen qatar qalyptasqan is-tájirıbelermen de bólis­ti. 2015 jyldyń baspasózine jazylý naý­qanynyń qorytyndysy boıyn­sha gazet-jýrnaldar kórsetkishi 170 myń dana­ny quraıdy. Taralymnyń 88,7 paıyzy aýyldyq jerlerge tıesili. Poshtany tasymaldaý 101 baǵyt boıynsha júzege asyrylady, marshrýttyń jalpy uzyndyǵy 27 myń shaqyrymǵa teń. Aýdan ortalyqtaryna poshta aptasyna 4-5 ret, al aýyldyq eldi mekenderdiń baılanys bólimshelerine 2-3 ret jetkiziledi. Jańa jyldan bastap aýdanaralyq baǵyt boıynsha poshta tasymaldaý jıiligin aptasyna 3 retten kem qylmaý mindeti tur. О́ńirde 14 ortalyq operasııa ýchaskesi, 14 qalalyq poshta baılanysy bólimshesi, 88 poshta baılanysy bólimshesi jumys istep, 339 eldi mekenge qyzmet kórsetedi. Budan tysqary 17 jyljymaly bólimshe 220 eldi mekendi qamtıdy, 19 tólemaqy qabyldaý qosyny bar. Sońǵy 4 jylda qyzmet kólemi 2,1 ese, eńbek ónimdiligi 2 ese ósti. Alqaly basqosýda «Severnyı Kazahstan» baspasynyń dırektory Ivan Moor, oblystyq «Soltústik Qazaqstan» gazetiniń bas redaktory Jarasbaı Súleı­menov, Jambyl aýdandyq «Aýyl araıy» gazetiniń redaktory Áset Mustafın, osy joldardyń avtory, taǵy basqalary sóılep, qordalanǵan máselelerdi birlesip sheshý, taratý jıililigin kóbeıtý, poshta qyzmetkerleriniń jalaqysyn kóbeıtý, ásirese, aýdan ortalyqtarynan eldi mekenderge gazet-jýrnaldardy tasymaldaýdy keshiktirmeý máselelerin sóz etti. Jıyn sońynda B. Mýsın baılanys salasynda 40 jyldan beri minsiz qyzmet etip kele jatqan Shal aqyn aýdany Aqanbaraq aýylynyń hat tasýshysy Alma Ahmetovaǵa «Eren eńbegi úshin» medalin saltanatty jaǵdaıda tapsyrdy. О́mir ESQALI, «Egemen Qazaqstan». Soltústik Qazaqstan oblysy.