Foto: inbusiness.kz
«Biz asa mańyzdy, ásirese qos el arasyndaǵy qaýipsizdik táýekelderin aıtarlyqtaı azaıtatyn Armenııa men Ázerbaıjan arasyndaǵy shekarany bólýdiń tájirıbelik úderisin bastadyq», dedi N.Pashınıan. Onyń aıtýynsha, KSRO ydyraǵan kezde qalǵan 1991 jylǵy shekara syzyǵyn qalpyna keltirý qajet.
Al Armenııa Syrtqy ister mınıstrligi 19 sáýir kúni Erevan men Baký shekaranyń jekelegen ýchaskesiniń delımıtasııasy, onyń ishinde tórt aýyldyń qaı elge tán ekendigi týraly aldyn ala keliskenin jáne ol eldi mekenderdi Ázerbaıjan alǵanyn málimdedi.
Jalpy shekarany delımıtasııalaý – shekaralas elder arasyndaǵy aldyn ala jasalǵan kelissózder arqyly shekaranyń orny men baǵytyn anyqtap, koordınattaryn qaǵazǵa túsirý. Osy qujat, ıaǵnı delımıtasııanyń materıaldary demarkasııaǵa – shekarany is júzinde júrgizýge negiz bolady.
Taraptar 15 mamyrǵa deıin jergilikti jerdegi geodezııalyq esepteýler negizinde naqtylanǵan koordınattardy eskere otyryp, shekara syzyqtary túsiriletin hattamaǵa qol qoıýǵa tıis. Úderis tolyq aıaqtalǵanǵa deıin shekaralar delımıtasııalanǵan bolyp sanalady.
Pashınıan buǵan deıin Ázerbaıjanǵa ótken tórt aýyl Armenııanyń táýelsiz aýmaǵynda ornalaspaǵanyn aıtqan. Biraq olardyń Tavýsh oblysyndaǵy tórt armıan aýylyna jaqyn mańda ornalasqanyn túsindirip ótti. Armenııa Premer-mınıstri ol aýyldardyń Ázerbaıjanǵa berilý múmkindigin joqqa shyǵardy. Pashınıan sonymen qatar eger Erevan shekarany túzetýge qazirden qamdanbasa, kórshimen eges qaıta bastalýy múmkin ekenin jáne ol jaqyn arada bitpeıtinin ashyp aıtty.
Delımıtasııa úderisi TMD-nyń nysandary men qaǵıdattary týraly 1991 jylǵy 21 jeltoqsandaǵy Almaty deklarasııasyna negizdelmek. Bul qujat Belovej kelisiminde maquldanǵan jáne ol boıynsha KSRO-nyń budan bylaı «halyqaralyq quqyq sýbektisi» retinde ǵumyry toqtatylyp, «janazasy shyǵarylǵan» bolatyn. Sonymen qatar bul qujat 1991 jylǵy shekarany saqtap, burynǵy keńestik elderdiń aýmaqtyq tutastyǵyn bekitken.
Kóp uzamaı Armenııa men Ázerbaıjan arasyndaǵy shekarada koordınasııalyq jumystar aıasyndaǵy geodezııalyq ólsheýlerge súıene otyryp, Tavýsh-Gazah ýchaskesine alǵashqy shekaralyq baǵan qaǵyldy. Bul aqparatty Nıkol Pashınıan óziniń Facebook-tegi paraqshasynda jarııa etti.
Al óńirdegi geosaıası ahýaldy retteýge jeteleıtin bul jańalyqqa alǵashqy bolyp Estonııa úkimeti ún qatty. Atalǵan eldiń Syrtqy ister mınıstrligi shekaralyq baǵannyń ornatylýyn, ıaǵnı 1991 jylǵy Almaty deklarasııasyn negizge alǵan demarkasııalyq úderisterdiń bastalǵanyn aıtýly oqıǵa dep baǵalap, bul istiń jalǵasatynynan úmitti ekenderin bildirdi.
