Foto: parlam.kz
Senat depýtatynyń sózinshe, Táýelsizdik alǵan jyldan bastap Qazaqstanda logıstıkalyq áleýetti arttyrý maqsatynda álemdik standarttarǵa sáıkes avtomagıstraldar salyndy. Degenmen, qazirgi ýaqytta jol boıyn kógaldandyrý máselesi tıisti deńgeıde sheshilmeı otyr.
«Qazirgi ýaqytta, respýblıkalyq mańyzy bar avtomobıl joldarynyń barlyq jelisi boıynsha «QazAvtoJol» ulttyq kompanııasy» AQ Aqmola, Aqtóbe, Almaty, Qaraǵandy, Shyǵys Qazaqstan oblystyq fılıaldarynda ǵana 5 aǵash otyrǵyzý ýchaskesi bar, sondaı ýchaskeler atalǵan oblystardan basqa aımaqtarda joq. 2021-2023 jyldary respýblıkalyq mańyzy bar avtomobıl joldaryna 3 myń túp aǵash pen kóshet otyrǵyzylǵan. Atap aıtqanda, Almaty oblysynda 253 shaqyrym jolǵa 1,2 myń túp, Qaraǵandy oblysynda 982 shaqyrym jolǵa 1,6 myń túp. Alaıda bul jalpy kólemge shaqqanda tym mardymsyz», dedi senator.
Senator jol boıyn kógaldandyrý jumysynyń kenjelep qalýynyń taǵy bir yqtımal sebebin atady. Bul - kógaldandyrý uıymdarymen, ǵylymı ınstıtýttarmen jáne botanıkalyq baqtarmen yntymaqtastyqtyń joqtyǵy. Senator osyǵan baılanysty Úkimet basshysynyń atyna birqatar naqty saýal joldady.
«Botanıkalyq baqtardyń ǵylymı áleýetin paıdalanýǵa Úkimet nıetti me? Respýblıkadaǵy avtomobıl joldary men temirjoldarǵa jaýapty mekemeler, sondaı-aq eldi mekender men qalalardy kógaldandyrýǵa jaýapty uıymdar óz qyzmetterine elimizdiń osyndaı áleýetti ǵylymı uıymdaryn qashan tartady? Memleket basshysynyń «Taza Qazaqstan» degen bastamasyn eldiń barlyq aımaqtarynda jedel júzege asyrý úshin Úkimet qandaı naqty sharalardy qolǵa alǵaly otyr?», dedi senator.
