Foto: Valerıı Býgaev
«Taza Qazaqstan» aýqymdy jalpyulttyq ekoaksııasy Pavlodar oblysynda da uıymdastyryldy. Oblys ortalyǵynda jappaı senbilik ótkizilip, júzdegen túp aǵash egildi. Pavlodar qalasynyń ákimi Hasar Habylbekov oblys ortalyǵyn odan ári kógaldandyrý jospary bastalyp ketkenin habarlady. Bıyl Pavlodar qalasynyń aýmaǵynda 20 myńǵa jýyq kóshet salynady. Onyń teń jartysy «Jasyl beldeýge» egiledi. Sondaı-aq negizgi kóshelerdegi shirigen aǵashtar kezeń-kezeńimen aýystyrylady.
Byltyr avtomattandyrylǵan sýarý keshenderi ǵashyqtar gúlbaǵynda, ortalyq gúlbaqta ornatyldy. Bıyl osyndaı júıeler ortalyq jaǵalaýda, Konstıtýsııa gúlbaǵynda, Máshhúr Júsip atyndaǵy ortalyq meshittiń aýlasynda, «Qazqonaq» tabıǵı eskertkishi aýmaǵynda paıda bolady.
О́ńirlik aqparat jáne azamattyq damý basqarmasynyń dereginshe, ekologııalyq aksııaǵa bul kúni 50 myń adam ún qosqan. Tazalyq jumysyna 1 200 tehnıka jumyldyrylyp, 10 myń tonna qoqys shyǵaryldy. Eldi mekenderde 8 myń aǵash kósheti, 5 myń buta egilgen.
Aksııany oblys ortalyǵyndaǵy №36 ekologııalyq baǵyttaǵy mektep túlekteri de qoldady. Olar mekteptiń túlekter alleıasyna júzdegen túp aǵash kóshetin ekti.
«Aǵash egý bizdiń mektepti damytýǵa berilip otyrǵan múmkindik dep qabyldaǵan durys. Bul kóshetter jaqyn jyldarda sońymyzdan ókshelep kele jatqan baýyrlarymyz ben sińlilerimizge amanat bolyp, birge jetile túspek. Al bul dástúrdi ózge de túlekter jalǵastyra beredi», deıdi mektep túlegi, qazirgi kúni atalǵan bilim shańyraǵynyń kórkem eńbek muǵalimi Alena Korıonova.
Bul mekteptiń aýlasynda qaıyń, úıeńki, qaraǵaı men shyrsha, boz arsha jáne basqa aǵash túrleri ósip tur.
Pavlodar oblysy
