Foto: akorda.kz
Prezıdentke Ulttyq qaýipsizdik komıtetiniń jyl basynan beri atqarǵan jumysynyń nátıjeleri, vedomstvony reformalaý barysy jáne aldaǵy kezeńge arnalǵan mindetter týraly esep berildi.
Qasym-Jomart Toqaevqa ulttyq qaýipsizdikke tónetin qazirgi syn-qaterler men qaýipterge baılanysty UQK qyzmetin jetildirý sharalary, sonyń ishinde normatıvtik-quqyqtyq bazany damytý, kadrlyq áleýetti nyǵaıtý, ozyq aqparattyq tehnologııalardy engizý jáne qyzmettik prosesterdi bıýrokratııadan aryltý jaıynda baıandaldy.
Ermek Saǵymbaev elimizde terrorıstik jáne ekstremıstik áreketterge jol bermeý jumystarynyń kúsheıtilgeni jóninde aıtty. Jyl basynan beri UQK materıaldary boıynsha terrorızm men ekstremızmge qatysy bolǵany úshin 25 adam sottaldy, sotqa deıingi tergeý amaldary aıasynda taǵy 13 adam ustaldy.
Memleket basshysyna krımınogendik ahýaldy saýyqtyrý sharalary týraly aqparat berildi. Ishki ister mınıstrligimen birlesip, 6 qylmystyq toptyń áreketine tosqaýyl qoıyldy jáne 35 adam tutqyndaldy. Zańsyz aınalymnan 148 qarý, qoldan jasalǵan 5 jarylǵysh qural, 32 granata jáne 4431 oq-dári tárkilendi.
Esirtki bıznesine qarsy kúres aıasynda 16 operasııa júrgizildi. Esirtki tasymaldaıtyn 18 halyqaralyq jáne 9 óńirlik arna, sondaı-aq 10 esirtki zerthanasy joıyldy. 800 keliden astam esirtki jáne psıhotroptyq zattar, 14 tonna hımııalyq reagentter men kóknár shıkizaty tárkilendi.
Ekonomıkalyq qaýipsizdikti qamtamasyz etý jáne sybaılas jemqorlyqqa qarsy is-qımyl sheńberinde memleketke 707 mıllıard teńgeden astam soma zalal keltirýge jol berilmedi jáne bıýdjetke 1,2 mıllıard teńge qaıtaryldy.
Memlekettik shekarany buzǵan 7 myńnan astam adam ustaldy. Shekara arqyly qarý-jaraq pen oq-dári, esirtki jáne basqa da tyıym salynǵan zattardy tasymaldaýǵa qatysty 395 árekettiń joly kesildi. Sondaı-aq 3,2 mıllıard teńge kólemindegi valıýtany jáne quny 7,6 mıllıard teńge bolatyn taýarlardy zańsyz ótkizýge tosqaýyl qoıyldy.
Budan bólek, Qasym-Jomart Toqaevqa memlekettik organdardyń aqparattyq júıelerine jasalǵan 50,3 mıllıon kıber jáne 819 DDoS-shabýylǵa toıtarys berilgeni týraly baıandaldy.
Kezdesý sońynda Prezıdent ulttyq qaýipsizdik organdarynyń qyzmet baǵyttaryna qatysty birqatar tapsyrma berdi.
