Ýnıversıtet basshylyǵy jaqynda Gonkongqa baryp ınstıtýsıonaldyq seriktestikti nyǵaıtý úshin akademııalyq utqyrlyq negizinde stýdent almasý, bakalavr, magıstr jáne PhD daıarlaýǵa qatysty memorandýmǵa qol qoıyp qaıtty. Nátıjesinde, ınjenerlik bilim berý men ǵylymdy damytý, jańa tehnologııalar ǵylymı-zertteý ortalyǵyn qurý, Sátbaev ýnıversıtetiniń stýdentterine arnalǵan kvotalar, irikteý sharttarynyń barysyna qatysty mámile jasaldy.
Álemdik ýnıversıtetterdiń QS reıtıngi boıynsha 70-orynda turǵan CityU ýnıversıteti – elimizde bıyl óz ókildigin ashýdy josparlap otyrǵan alǵashqy Gonkong ýnıversıteti. CityU ýnıversıteti fılıalynyń ashylýy Qazaqstan stýdentteri úshin jańa kókjıekter ashyp, bilim alý tájirıbesin baıytýǵa jáne elimizde jasandy ıntellekti qoldanýdyń aýqymyn keńeıtýge múmkindikter ashatyny anyq.
Gonkongtaǵy kezdesýde CityU basqarmasy tóraǵasy Lester Hýan «Qazaqstandaǵy eń kóne tehnıkalyq ýnıversıtetpen yntymaqtastyǵymyz, ıaǵnı CityU jáne Sátbaev ýnıversıtetteri arasyndaǵy kelisim bilimdi, bilikti jastardy daıarlaýdyń zamanaýı múmkindikterine jol ashyp, ǵylym men bilim berýdiń shekarasyn munan da keńeıte túsedi» dep atap ótse, CityU HK prezıdenti, professor Freddı Boıdyń aıtýynsha, bul yntymaqtastyq aıasynda stýdentter, magıstranttar men doktoranttar birlesip jasaǵan jumystarymen ǵana emes, mádenı salada da bilim almasatyn bolady.
Q.Sátbaev atyndaǵy QazUTZÝ rektory Meıram Begentaev óz sózinde atap ótkendeı, Polıtehtiń damýynda osy sátten bastalǵan jańa kezeń – álemdegi eń úzdik ýnıversıtetterdiń birimen seriktestik kelisimi ınjenerlik tehnologııalar salasyndaǵy bilim men ǵylymı-zertteý jumystarynyń damýyna yqpal etedi.
– Eki ýnıversıtet arasyndaǵy yntymaqtastyq aıasynda materıaltaný jáne jasandy ıntellekt boıynsha birlesken bilim berý baǵdarlamalaryn jasaý josparlanyp otyr. Sondaı-aq Sátbaev ýnıversıtetiniń ǵalymdary CityU-diń kelesi jyly iske qosylatyn jańa ǵylymı baǵdarlamalaryna qatysý múmkindigi qarastyrylýda. Eńbek naryǵynyń qazirgi jaǵdaıyna beıimdelgen joǵary bilimdi mamandardy qysqa merzim ishinde daıarlaý júıesi ǵylym men ınnovasııany damytý arqyly joǵary nátıjege jetýge bolatynyn CityU ýnıversıtetimen kelisimderdiń bolashaǵynan kóremiz, – dedi rektor.
Satbayev ýnıversıtetiniń zerthana jetekshisi Seıithan Azatulynyń aıtýynsha, stýdentter 2 dıplom alyp shyǵa alady. Elimiz stýdentteri CityU zerthanalaryn tegin paıdalana otyryp, zertteý jumystaryn júrgizýge, álemdik deńgeıdegi ǵalymdarmen birge dıssertasııalyq jumystaryn jazýǵa, sondaı aq kadr almasýǵa múmkindik beredi.
Bıyl Sátbaev ýnıversıtetiniń 200-ge jýyq stýdenti men oqytýshylary CityU-men qatar álemniń jetekshi ýnıversıtetterinde bilim alyp, jumys isteıdi. Ýnıversıtet búginde Pensılvanııa memlekettik, AQSh, Songıýngvan ýnıversıteti, Ońtústik Koreıa, Glazgo ýnıversıteti, Ulybrıtanııa, sondaı-aq kórshiles shetelderdiń jetekshi joǵary oqý oryndarymen yntymaqtastyqty nyǵaıtyp otyr.
ALMATY
