Foto: Joǵarǵy Sot
JShS, ıaǵnı jalǵa alýshy tarap AQ-nyń josparly jóndeý jumystaryn júrgizý mindetin buzýyna baılanysty Ýkraına aýmaǵynda ornalasqan 100 vagonǵa qatysty bóligindegi shartty buzý týraly talappen sotqa júgingen.
«Birinshi satydaǵy sot shart talaptarynan eleýli buzýshylyqtardy tappaı, talap qoıýdy qanaǵattandyrýdan bas tartqan. Apellıasııa daýdy talap qoıýshynyń paıdasyna sheshken, óıtkeni jaýapker nysanaly maqsaty boıynsha paıdalanýǵa bolmaıtyn vagondarǵa jóndeý jumystaryn júrgizbegen, bul sharttyń talaptaryna sáıkes shartty birjaqty buzýǵa negiz bolyp tabylady», delingen Joǵarǵy Sot habarlamasynda.
Qazirgi ýaqytta Astana qalalyq soty atalǵan taraptardyń arasyndaǵy 239 vagondy qaıtarý mindettemesine, sondaı-aq shartty ózgertýge jáne ony ishinara buzýǵa qatysty eki isti qarap jatyr.
Osy shaǵymdy qaraý barysynda Joǵarǵy Sottyń azamattyq ister jónindegi sot alqasy taraptarǵa tatýlasý quqyqtaryn, sondaı-aq daýdy medıasııa tártibimen retteý týraly kelisim jasasý tártibin, saldaryn jáne artyqshylyqtaryn túsindirýi nátıjesinde daýlasýshylar ortaq mámilege kelgen.
«Kelissózder nátıjesinde taraptar sot talqylaýynyń nysanasy bolǵan barlyq kelispeýshilikter boıynsha kelisimge kelip, daýdy medıasııalyq kelisim jasaý arqyly sheshý týraly kassasııaǵa birlesken ótinishhat berdi. Joǵarǵy Sot daýlasýshy taraptar qol qoıǵan medıasııa kelisimin bekitti, oǵan sáıkes taraptar belgilengen tártipte jáne belgilengen merzimde óz mindetterin erikti túrde oryndaýǵa kelisti. Oryndamaǵan jaǵdaıda – májbúrlep oryndaýǵa beredi. Is boıynsha is júrgizý toqtatyldy», dep habarlady Joǵarǵy Sot.
Osylaısha, tatýlasý sot talqylaýynyń uzaqqa sozylýyn boldyrmady jáne artyq shyǵyndardyń jumsalýyna jol bermedi. Sot memlekettik bajdy talap qoıýshyǵa bıýdjetten qaıtarýǵa múmkindik berdi jáne iskerlik, seriktestik qatynasty saqtap qaldy.
