Foto: instagram.com. obl_zdrav_kostanay
Saǵat 16:10-da Arqalyq – Aqsuńqar sanıtarlyq reısin oryndaǵan «Navıgator» áýe kompanııasynyń An-2 ushaǵy áýege kóterilgennen keıin kúrt tómen túsip, erigen qar sýyna qona bergende aýdarylyp ketken.
Bortta 2 ekıpaj múshesi men 3 jolaýshy bolǵan, olardyń barlyǵy Arqalyq qalasyndaǵy qalalyq aýrýhanaǵa jetkizilgen. Oqıǵanyń mán-jaıyn anyqtaıtyn komıssııa quryldy.
Oblystyq densaýlyq saqtaý basqarmasynyń baspasóz qyzmeti aýdarylyp ketken ushaq bortynda júrek talmasyna shaldyqqan naýqas bolǵanyn habarlady.
«3 mamyrda saǵat 09:04-te medısınalyq avıasııanyń elektrondyq poshtasyna 1964 jyly týǵan mıokard ınfarktisi dıagnozymen naýqasty tasymaldaý týraly ótinish tústi. Naýqasty Qostanaı oblystyq aýrýhanasyna jetkizý úshin saǵat 16:09-da quramynda eki ushqysh, dáriger jáne feldsher bar sanıtarlyq avıasııa brıgadasy Arqalyq qalasyna ushty. Ekpindi jeldiń saldarynan sanıtarlyq avıasııa áýege kóterilý kezinde aýdarylyp qalǵan», delingen basqarma habarlamasynda.
Naýqas eshqandaı jaraqat almaǵan, jaǵdaıy turaqty. Qazir Arqalyq aýdandyq aýrýhanasynda emin jalǵastyryp jatyr. Sanıtarlyq avıasııa toby da jaraqat alǵan joq, qazir olar dárigerlerdiń baqylaýynda.
