Foto: Qorǵanys mınıstrligi
Is-sharaǵa «Tayelsiz Qazaqstannyn Halyq Batyrlary» RQB basshysy Halyq Qaharmany general-leıtenant Baqytjan Ertaev, «Qarýly Kúshter ardagerleri» RQB tóraǵasynyń orynbasary general-maıor Marat Naǵumanov, Qorǵanys mınıstrligi Áskerı bilim jáne ǵylym departamenti bastyǵynyń orynbasary polkovnık Amangeldi Toǵysov, Qazaqstan Respýblıkasy Ulttyq qorǵanys ýnıversıtetiniń, L.Gýmılev atyndaǵy Eýrazııa ulttyq ýnıversıtetiniń, M.Jumabaev atyndaǵy Halyqaralyq kolledjdiń oqytýshylary, áskerı oqý ornynyń kadetteri men ulandary qatysty.
Is-shara áskerı kolledj aýmaǵynda ornalasqan Saǵadat Nurmaǵambetovtiń bıýstine gúl shoqtaryn qoıýdan bastaldy. Saltanatty rásimge qatysýshylar halyq batyryn bir mınýt únsizdikpen eske aldy.
Qarýly kúshterdiń Memlekettik áskerı-tarıhı mýzeıiniń qoldaýymen kolledjde batyr ómirbaıanynyń kezeńderin beıneleıtin fotokórme, áıgili generalǵa arnalǵan murajaı ekspozısııasy uıymdastyryldy. Onda general formasy, kıteli, Uly Otan soǵysynda paıdalanǵan komandırlik sómkesi men kartasy, Saǵadat Nurmaǵambetovtyń beınesi toqylǵan kilem ilingen.
Jıyn barysynda Qarýly kúshterdiń ardagerleri Baqytjan Ertaev pen Marat Naǵumanov quttyqtaý sóz sóıledi. Konferensııada Ulttyq qorǵanys ýnıversıtetiniń aǵa oqytýshysy polkovnık Asqar Makıpov, L.Gýmılev atyndaǵy Eýrazııa ulttyq ýnıversıtetiniń áskerı kafedrasynyń oqytýshysy polkovnık Atyǵaı Balǵabekov, M. Jumabaev atyndaǵy Halyqaralyq kolledjiniń AÁD oqytýshylary podpolkovnık Erlan Serikbaev pen kapıtan Serik Súleımenovtyń baıandamalary tyńdaldy.
Is-sharaǵa qatysýshylar Saǵadat Nurmaǵambetovtyń ómiri men jaýyngerlik jolynyń jastardy áskerı-patrıottyq tárbıeleý isindegi mańyzyn atap ótti. Qazaqstannyń birinshi Qorǵanys mınıstriniń esimimen atalatyn áskerı kolledj tárbıelenýshileri Saǵadat Qojahmetulynyń ómirbaıanyn jaqsy biletinin aıta ketken jón. Onyń qurmetine oqý ornynyń hory «Saǵadat» ánin jáne erjúrek mamandyq ókilderi – Otan qorǵaýshylarǵa arnap basqa da shyǵarmalar oryndady. Al ulan Ámzehan Sátjan Halyq Qaharmany Saǵadat Nurmaǵambetov týraly ózi shyǵarǵan óleńdi oqyp berdi.
