Foto: primeminister.kz
Búgingi tańda Qazaqstannyń barlyq óńiri men Astana, Almaty jáne Shymkent qalalarynda ardagerlerge tólem jasaldy. Atalǵan maqsattarǵa jergilikti bıýdjetterden barlyǵy 187 mln teńge bólindi.
«Áleýmettik kómek kórsetýdiń qoldanystaǵy qaǵıdalaryna sáıkes 9 mamyrǵa oraı beriletin birjolǵy tólemder somasy jergilikti bıýdjetterdiń múmkindikterine jáne máslıhattardyń sheshimderine baılanysty ár oblysta derbes belgilenedi», delingen habarlamada.
QR Eńbek jáne halyqty áleýmettik qorǵaý mınıstrliginiń usynysy boıynsha sońǵy jyldary kóptegen oblystarda ardagerlerge tólemder biryńǵaı mólsherde tólenedi.
«Máselen, bıyl respýblıka boıynsha birjolǵy áleýmettik kómektiń ortasha mólsheri 1,5 mln teńgeni qurady. Bul rette kóptegen óńirlerde ortasha mólsherden joǵary soma tólendi: Aqmola oblysynda – 3 mln teńge, Aqtóbe oblysynda – 2 mln teńgeden astam. Abaı, Almaty, Qaraǵandy, Pavlodar oblystary men Astana jáne Almaty qalalarynda UOS qatysýshylary 2 mln teńgeden aldy», dep jazdy Úkimettiń baspasóz qyzmeti.
Búginde respýblıkada 148 soǵys ardageri turady. Soǵys qatysýshylaryna áleýmettik qoldaýdyń basqa da túrlerine qaramastan aı saıyn 16 AEK (2024 jyly 59 072 teńge) mólsherinde arnaýly memlekettik járdemaqy tólenedi.
