Buıra bulttyń baýyrynan sebezdegen tamshydaı jan jaılaýyn jadyratar móldir shyǵarmalar jyl saıyn Jetisý rýhanııatyna qosylyp jatyr. Sonyń biri – rejısser Musataı Aqynjanovtyń «Altyn saqa» ertegisi. Bul qoıylymnyń ereksheligi sol, 3D Fantasy nusqada alǵash ret sahnaǵa jol tartty. Buryn teatrda 1979 jyly rejısser Muhtar Qambarov sahnalaǵan edi. Týra 45 jyldan keıin atalǵan ertegi fentezı janrynda qaıta jańǵyryp otyr.
«Biz ertegini balalarǵa zaman talabyna saı nusqada usynyp otyrmyz. Munda qazirgi baldyrǵandardyń qarym-qabileti, oılaý deńgeıi eskerilgen. Jeńil ári qyzyqqa toly qoıylym. Bastaýysh synyp oqýshylarynyń súıikti ertegisi bolady dep oılaımyn», deıdi qoıýshy-rejısser Mereı Ájibekov.
Onyń aıtýynsha, spektakldiń sátti shyǵýyna qoıýshy-sýretshi Janat Dúısenbaev pen kostıým-sýretshisi Qarlyǵash Shalabaevanyń sińirgen eńbegi zor. Ujymdaǵy ártister de kishkentaı kórermenderdiń kóńilinen shyǵýǵa baryn salǵan.
«Altyn saqadaǵy» balanyń boıynda klassıkalyq batyrlyq ertegige tán belgilerdiń bári bar. Jurtta qalyp qoıǵan altyn saqasyn alyp kelýge baryp, jalmaýyz kempirge kez bolǵan bala kempirdiń aldaǵanyna senbeı, saqasyn at ústinen ilip alyp, qasha jóneledi. Mystan kempir tura qýady. Osymen oqıǵa shıelenise túsedi. О́mirdegi tartystar, mıftik kórinister, ulttyń ádet-ǵurpy barlyǵy ertegide kórsetiledi.
«Maǵan ertegi qatty unady. Ásirese jalmaýyz kempirdiń qylyqtary erekshe. Aramyzda qorqyp otyrǵandar da boldy. Biraq akterler nanymdy oınap, rólderin óte jaqsy alyp shyqty. Dál osy qoıylymǵa kelgenime qýanyshtymyn. Ertegini bulaı asa zor qyzyǵýshylyqpen alǵash ret tamashalap otyrmyn», deıdi mektep oqýshysy Ársen Elmurat.
Kishkentaı keıipkerdiń erliginiń nátıjesinde onyń ata-anasy ǵana emes, tutas týǵan eli jalmaýyz kempirdiń qorlyq-zorlyǵynan azat bolady. Qyzyqty qoıylym baldyrǵandardy aqyldy bolýǵa tárbıelep, batyrlyq pen batyldyqqa shaqyrady.
