Aımedet Oral qalasyndaǵy oblystyq mamandandyrylǵan daryndy balalarǵa arnalǵan IT lıseı mektebin bitirgen. Qazir Nazarbaev ýnıversıtetinde Robottehnıka baǵytynda oqıdy. Jas ónertapqysh múmkindigi shekteýli jandardyń júris-turysyn jeńildetkisi kelgen. Ol karantın kezinde «Bıznestiń jol kartasy – 2025» jobasy aıasynda 3,3 mln teńge grant utqan. Sol aqshaǵa elektrli kólik jasaıtyn sheberhana ashqan. Onda múgedektik arbasyna bekitiletin, toqtan qýat alatyn qondyrǵy daıyndalady. Kózdi ashyp-jumǵansha bir jańalyq ashylatyn órkenıet órisinde bul joba qansha jyldan beri halyqty qýantyp keledi.
«Meniń startap-jobam erekshe adamdardyń ómirin jeńildetýge kómektesedi. Kóbine syrtqa shyǵý nemese jaı serýendeý úshin olarǵa bireýdiń kómegi qajet. Maqsatym – ol kisilerge qozǵalysta erkindik berý. Bul oı 2019 jyly ýnıversıtettiń daıyndyq kýrsynda oqyp júrgen kezimde paıda boldy. Sodan keıin alǵash ret NU-da ótken meıkatonǵa (72 saǵattyq marafon, onda ónertapqyshtar múgedekterdiń ómirin jeńildetý úshin qurylǵylar ázirleıdi) qatystym. Bizdiń komandada tórt adam boldy, men baıqaýdyń eń jas qatysýshysy boldym. Solaı arbanyń alǵashqy prototıpi jasaldy. Oqyp jatqan baǵytym elimizde endi paıda bolyp jatyr. Tikeleı robottehnıka kýrstaryn oqytady. Robottehnıka salasynda elimizde túrli jarys, oqý ádisteri kóbeıip keledi. Robottehnıkanyń beretin múmkindigi óte kóp, biraq ol múmkindik elimizde joq. Bilimimizdi paıdalanatyn oryndar óte az. Naqtyraq aıtqanda, zaýyt, robottardy paıdalanatyn jerler áli damymaǵan. Biz eldiń bolashaǵy sanalǵandyqtan, osy robottehnıkany elde damytýymyz kerek dep oılaımyn», deıdi jasampaz jigit.
Joba «Bulan» dep atalady. Alǵashynda kishigirim bolyp ashylǵan sheberhana qazir úlkeıip, ortalyqqa aınalyp keledi. Elektrvelosıped, elektrlongbord, múgedek arbasyna arnalǵan elektr qondyrmasyn jasaıdy. Budan bólek basqa da «Onewheel», «Drıft traık» sekildi elektrli kólikterdi oılap tabý josparda bar.
«Shyǵarǵan jańa ónimderimizdi aıtatyn bolsaq, múgedek arbasyna arnalǵan elektr qondyrǵysy. Atalǵan jobamen turaqty jumys istep jatyrmyz. Qondyrǵy múmkindigi shekteýli jandardyń ómirin jeńildete túsedi. Statıstıkaǵa súıensek, elimizde 702 myń adam múgedektigi boıynsha tirkelgen. Sonyń ishinde 250 myńy – birinshi toptaǵy múgedekter. Olardyń basty máselesi – bireýdiń kómegine qarap otyrý, ıaǵnı óz betimen qalaǵan ýaqytynda syrtqa shyǵa almaıdy. Ýaqyty ózgelerge táýeldi. Al biz jasaǵan qurylǵy olardyń táýelsiz qozǵalýyna múmkindik beredi. Artyqshylyǵy qurylǵyny arbasyna ózi qalaǵan ýaqytynda qoıyp, sheshe alady. Sondaı-aq qondyrǵy barlyq arbaǵa kele beredi», deıdi Aımedet.
«Bulan» jobasymen Aımedet «NURIS Hardware Challenge 2.0» startap baıqaýynyń fınalynda grantty jeńip aldy. Ol jobany odan ári damytýǵa, adamdardyń ómir súrý sapasyn jaqsartý úshin basqa da ázirlemeler jasaýǵa nıetti.
«Elimizde jumys istep, adamdarǵa paıdaly ónimder ázirlegim keledi. Joǵary sapaly elektr prıstavkalaryn jasaımyn. Elimizde áýesqoılar bar, olar óz betterinshe tehnıka jasap, bir nárse oılap tabady, biraq úlken kólemde ındýstrııa men óndiriske aınalǵany mańyzdy. О́z mysalymda elektr kóliginiń suranysy joǵary ekenin kórsettim. Ǵylym men jańa ázirlemeler qarapaıym ómirdiń sapasyna qatty áser etedi, biz ony árdaıym baıqaı bermeımiz. Jańa ıdeıalar qorshaǵan ortany jaqsartýǵa jáne adamdardyń ıgiligi úshin jumys isteýge kómektesýi kerek», deıdi Aımedet.
