Shymkent qalasynda mamandardy birlesip daıarlaý máselesi eki el úkimetteri deńgeıinde talqylanyp, KazNARU men TIAShMII ǵylymı zertteý oqý oryndary rektorlarynyń kezdesýi ótken bolatyn. Nátıjesinde, Tashkent qalasynda KazNARU bazasynda fılıal ashý jónindegi Jol kartasy qabyldanyp, joǵary oqý oryndary arasynda 2028 jylǵa deıin ǵylym-bilim qyzmeti salasynda yntymaqtastyq kelisimsharty jasaldy.
Bilikti mamandar daıarlaýdy maqsat etken kelisimder aıasynda KazNARU basqarma tóraǵasy – rektor Aqylbek Kúrishbaev pen TIAShMII ǵylymı zertteý ýnıversıtetiniń rektory Bahodır Mırzaev Sý habynyń aýdıtorııalary men ǵylymı-zerthanalarynyń jumysymen tanysty. Sonymen birge ınfraqurylymdy damytý, qarjylandyrýdy nyǵaıtý, oqý úrdisin jetildirý úshin zamanaýı oqý jáne ǵylymı ádebıettermen qamtamasyz etý, sý resýrstaryn basqarý, sýdy paıdalaný, melıorasııa jáne jerdi rekýltıvasııalaý salasynda birlesken ǵylymı jobalardy ázirleýge qatysty taıaý ýaqytta júzege asatyn baǵyttardy jan-jaqty talqylady.
«Memleket basshysy agroónerkásiptik sektordy damytýdyń basym baǵyttaryn aıqyndaı otyryp, naryqta suranysqa ıe mamandardy daıarlaýǵa bazalyq joǵary oqý ornyn anyqtaý jóninde naqty mindetter qoıǵany belgili. Osyǵan oraı jaqynda Ǵylym jáne joǵary bilim mınıstri Saıasat Nurbek TIAShMII ǵylymı zertteý ýnıversıtetiniń fılıalyn KazNARU-da ashý týraly buıryqqa qol qoıdy. Joǵary jáne joǵary oqý ornynan keıingi bilim berýdiń jalpyǵa mindetti standartyna sáıkes «V082 Sý resýrstary jáne sýdy paıdalaný», «M137 Sý resýrstary jáne sýdy paıdalaný» bilim baǵdarlamalary boıynsha KazNARU-men birlesip ázirlengen qosdıplomdyq bakalavrıat jáne magıstratýra baǵdarlamalaryn iske asyra otyryp, biliktiligi joǵary sý sharýashylyǵy mamandaryn daıarlaıtyn bolamyz», dep atap ótti rektordyń birinshi orynbasary Pirimqul Ibragımov.
Tashkent ırrıgasııa jáne aýyl sharýashylyǵyn mehanıkalandyrý ınjenerleri ınstıtýty ǵylymı-zertteý ýnıversıtetiniń tarıhy 1923 jyldan Túrkistan memlekettik ýnıversıteti gıdrotehnıkalyq bóliminiń bazasyndaǵy ınjenerlik-melıoratıvtik fakýltetinen bastalady. 1929 jyly osy fakýltet negizinde Ortalyq Azııa maqta-ırrıgasııalyq polıtehnıkalyq ınstıtýty quryldy. 1934 jyly bul oqý orny Ortalyq Azııanyń sýarý jáne aýyl sharýashylyǵyn mehanıkalandyrý ınjenerleri ınstıtýtymen biriktirilip, Tashkent sýarý jáne aýyl sharýashylyǵyn mehanıkalandyrý ınjenerleri ınstıtýty bolyp ózgertildi. Bastapqyda onyń qurylymynda gıdromelıorasııa jáne melıorasııa fakýltetteri ǵana bolǵan. Odan keıingi kezeńde jerge ornalastyrý, gıdromelıorasııalyq jumystardy mehanıkalandyrý, tehnologııa jáne aýylsharýashylyq mashınalaryn jóndeýdi uıymdastyrý, jalpy ınjenerlik fakýltetter ashylyp, oqý baǵdarlamasyndaǵy ınnovasııalyq ózgerister búginde atalǵan ınstıtýttyń halyqaralyq naryqta ınjener kadrlar daıarlaýdaǵy reıtınginiń artýyna yqpal etip otyr. 2021 jyly oqý ornynyń ataýy Tashkent ırrıgasııa jáne aýyl sharýashylyǵyn mehanıkalandyrý ınjenerleri ınstıtýty ulttyq ǵylymı-zertteý ýnıversıteti bolyp ózgertildi.
Búginde ýnıversıtet gıdroenergetıka, ırrıgasııa, melıorasııa, aýyl sharýashylyǵyndaǵy ınnovasııalyq tehnıkalar men tehnologııalar, sý únemdeıtin sýarý tehnologııalary, jańartylǵan energııa kózderi, geodezııa jáne geoınformatıka, ekologııa men qorshaǵan ortany qorǵaý baǵyttary boıynsha joǵary bilikti kadrlardy daıarlaý jónindegi bazalyq joǵary oqý orny retinde aımaq elderine tartymdy bolyp otyr. Munda 12 myńnan astam stýdent 40 baǵyt boıynsha 7 fakýltette bilim alyp, magıstratýradan 32 mamandyq alyp shyǵady.
KazNARU Sý habynyń dırektory Andreı Rıabsevtiń aıtýynsha, fılıalda bilim berý, oqýǵa qabyldaý jáne bilim sapasyn basqarý tártibi elimiz zańnamasy, sondaı-aq fılıaldyń ishki qujattarymen retteledi. Stýdentterge qazaq, orys, aǵylshyn tilderin jáne «Qazaq tili» men «Qazaqstan tarıhyn» oqytý josparlanǵan. Oqý úrdisine sheteldik professor-oqytýshylardy tartý kózdelip otyr. Jańa fılıaldyń ashylýy sý sharýashylyǵyna qajetti básekege qabiletti mamandar daıarlaýmen qatar О́zbekstan men Qazaqstannyń sý resýrstaryn utymdy paıdalaný, aýyl sharýashylyǵy ónerkásibi salasynda ınnovasııalyq tehnologııalardy ázirleý, sıfrly ekonomıkany damyta otyryp, Ortalyq Azııadaǵy sý qaýipsizdigin nyǵaıtýǵa baǵyttalǵan keshendi bilim baǵdarlamalaryn iske asyratyn bolady.
Qazirgi kezde eki ýnıversıtet arasynda jasalǵan kelisimshart negizinde KazNARU Sý, jer jáne orman resýrstary fakýlteti birinshi kýrsynyń 15 stýdenti Tashkentte Irrıgasııa jáne gıdrotehnıkalyq qurylystar fakýltetinde bilim alyp jatyr.
ALMATY
