Foto: Qorǵanys mınıstrligi
Is-sharany «Áskerı-strategııalyq zertteýler ortalyǵy» AQ jáne «Qarýly kúshter ardagerleri» RQB Ortalyq keńesi uıymdastyrdy. Sımpozıýmǵa Qorǵanys mınıstrliginiń, QR Prezıdenti muraǵatynyń, Áskerı-strategııalyq zertteýler ortalyǵynyń, Ulttyq qorǵanys ýnıversıtetiniń basshylyǵy, Qarýly kúshterdiń áskerı qyzmetshileri men ardagerleri, Astana qalasyndaǵy áskerı kolledj kadetteri, «Jas sarbaz» balalar-jasóspirimder áskerı-patrıottyq qozǵalysynyń tárbıelenýshileri qatysty.
Qorǵanys mınıstri general-polkovnık Rýslan Jaqsylyqov qatysýshylardy elimizde Saǵadat Nurmaǵambetovtiń mereıtoıy aıasynda ótkizilip jatqan is-sharalar týraly aıtty.
Almaty qalasyndaǵy Qurlyq áskerleri áskerı ınstıtýtynda «Áskerı ant» teleserıaly túsirildi. Sondaı-aq 25 mamyr kúni Aqmola oblysynyń Aqkól qalasynda Saǵadat Nurmaǵambetov atyndaǵy eskertkish pen skver ashylady. Bıylǵy jyldyń 16-sy men 23-i maýsymy aralyǵynda Almaty qalasyndaǵy Qurlyq áskerleri áskerı ınstıtýtynyń «Álı» oqý-jattyǵý ortalyǵynda halyq batyrynyń qurmetine «Aıbyn» X Halyqaralyq áskerı-patrıottyq jastar jıyny da ótedi.
General-polkovnık Rýslan Jaqsylyqov 1-shi Túrkistan pýlemet áskerı ýchılıshesiniń túlegi Saǵadat Nurmaǵambetovtiń Uly Otan soǵysy tarıhyndaǵy biregeı ornyn atap ótti.
«Áskerı qyzmetke 50 jyldan astam ǵumyryn arnaǵan batyr soǵys jyldaryn pýlemet vzvodynyń komandıri retinde bastap, atqyshtar batalonynyń komandıri bolyp aıaqtady. Uly Otan soǵysynda Kýbannan Berlınge deıingi joldy ótti. Onyń úzeńgiles dosy, jaýyngerlik serigi, ofıser, soǵysqa qatysýshy Leonıd Gırsh Saǵadat Nurmaǵambetovtiń búkil soǵysta maıdanda, oq pen ottyń arasynda ótkergenin aıtady», dedi general-polkovnık Rýslan Jaqsylyqov.
«Qarýly kúshter ardagerleri» RQB Ortalyq keńesiniń tóraǵasy Halyq qaharmany armııa generaly Muhtar Altynbaev kóz kórgen basshysy jaıly jyly estelikterimen bólisse, «Áskerı-strategııalyq zertteýler ortalyǵy» AQ prezıdenti general-maıor Ashat Ryspaev armııa generaly Saǵadat Nurmaǵambetovtiń mereıtoıyna arnalǵan ǵylymı-zertteý jumysyn tanystyrdy.
Qazaqstan Respýblıkasy Prezıdenti muraǵatynyń dırektory Álııa Mustafına óz sózinde armııa generaly Saǵadat Nurmaǵambetovtiń ómiri men qyzmetine qatysty materıaldar men qujattardy jınaý jumystary týraly málimdedi.
Qorǵanys mınıstrligi men sımpozıýmǵa qatysýshylarǵa halyq batyrynyń qyzy Aısulý Saǵadatqyzy Nurmaǵambetova beınebaılanys arqyly alǵysyn jetkizdi.
Is-shara sońy Qarýly kúshterdiń birqatar ardagerine «S.Q. Nurmaǵambetovke 100 jyl» estelik belgisin tabystaýmen jáne QR Qarýly kúshteri Ulttyq áskerı-patrıottyq ortalyǵy shyǵarmashylyq ujymynyń merekelik konsertimen aıaqtaldy.
