Aǵylshyn ınjeneri Hıýbert Sesıl Být 1901 jyly óziniń arnaıy fıltri bar shańsorǵyshyn jasaıdy. Vakýýmdy sorǵynyń kúshi bes jylqyǵa tatıtyn. Oǵan qosa, benzındi qozǵaltqyshpen jumys isteıdi. Keıin ol elektrmotorly nusqasyn jasaıdy. Biraq eki shańsorǵysh ta óte úlken edi, ony tek attardyń kómegimen ǵana jyljytýǵa bolatyn. 1908 jyly amerıkalyq kompanııa «W. H.Hoover Company» alǵash ret jınaqy «tin model» atty shańsorǵysh jasap shyǵarady. Jınaqy degende de onyń salmaǵy 20 kg edi. Ýaqyt óte kele onyń salmaǵy azaıa berdi. Búginde ol barlyq úıde kezdesetin mańyzdy ónertabysqa aınaldy.
Baǵdarsham
Eń alǵashqy baǵdarsham 1868 jyly Londonda paıda bolǵan. Ony oılap tapqan aǵylshyndyq ınjener – Djon Pık Naıt.
Áýelde baǵdarshamnyń qasynda kúni-túni polısııa qyzmetkeri qaraýyldap, iske qosyp turǵan. Tústerdiń maǵynasyn jalpy halyqqa uqtyrý úshin London gazetterinde arnaıy erejeler jazylyp túsindiriledi. Biraq únemi adamnyń qatysýymen júzege asatyn bul ónertabys kópke barmaıdy. Eń alǵashqy avtomatty baǵdarsham AQSh-tyń Klıvlend shtatynda 1914 jyly ornatylady. Aıtpaqshy, bular tek qyzyl men jasyl tústen ǵana turǵan edi. Al sary tús 1918 jyly ǵana paıda boldy.
Elektr peshi
1859 jyly 20 qyrkúıekte Djordj B.Sımpsonnyń avtorlyǵymen taǵamdy jylytyp, daıyndaýǵa arnalǵan ónertabys tirkeldi.
Alaıda Sımpsonnyń bul jumysy tek qaǵaz túrinde qalady, ıaǵnı ol tek josparyn ǵana jasap úlgeredi. Al kanadalyq kásipker Tomas Ahern 1882 jyly ónertabysty qaıta patenttep qana qoımaı, onyń múmkindikterin halyqqa usyna bildi. Sol jyly ol «Vındzor» qonaqúıine tanystaryn shaqyryp, elektr peshi arqyly pisken tamaqtardy usynady. Kanadalyq jýrnalıster onyń ónertabysy jaıynda jarysa jazady. Degenmen gaz plıtalaryn paıdalaný sol ýaqyttary arzan ári tıimdi bolmaǵandyqtan, jańa ónertabysy oǵan aıtarlyqtaı paıda ákelmeıdi. Adamdar tek 1930 jyldardan bastap qana elektr peshterin qoldana bastady.
