Týrızmniń ólshemi – tazalyq

Taıaýda tabıǵat janashyrlary qoldyń salasyndaı aq qaıyńdar men máńgi jasyl qaraǵaılar kómkergen Býrabaı baýraıyn, bir shókim gaýhardaı móldirep jatqan kúmis kólderdiń jaǵa­laýlaryn tazalaýǵa qatysty. Jal­paq jurtty jumyldyrǵan «Taza Qazaqstan» respýblıkalyq aksııasy aıasynda qyrýar jumys tyndyryldy.

– «Móldir bulaq» aksııasyna stýdentter men eriktiler, medısına jáne bilim mekemeleri qyzmetkerleri men memlekettik qyzmetshiler qatysyp jatyr. Tipti ózderiniń júrek qalaýy boıynsha týǵan jerdiń óńin keltirýge atsalysyp jatqan bylaıǵy adamdar da az emes. Býrabaı baýraıyna jaz maýsymynda mıllıonnan astam adam keledi, – deıdi Býrabaı aýdanynyń ákimi Araı Sadyqov, – munshama adam júrgen kezde tazalyq saq­taý da ońaı emes. «Taza Qazaq­stan» ekologııalyq aksııasy bas­talǵaly 12 tonnaǵa jýyq qoqys shyǵaryldy. Bıyl 400-den astam jańa konteınerler ornatpaqpyz.

Jadyraǵan jaz aılarynda bul óńirde sál ǵana ásirelep aıtqanda, ıne shanshar jer taba almaısyz. Týrızm tabys kózi bolǵanymen, jergilikti jurt tumsa tabıǵattyń aı júzine kireýke túspeı, balaýsa kúıinde saqtalyp qalǵandyǵyn qalaıdy.

– Ásirese Býrabaı ózenderi men kólderiniń jaǵalaýlary tazalaýdy qajet etedi, – deıdi «Oqjetpes» demalys úıiniń býhgalteri Aısulý Nurqanova, – demalys maýsymyna áli biraz ýa­qyt bolǵanymen, qazirdiń ózinde muntazdaı tazalap, jar­qy­ratyp qoıǵan jón. Eń bastysy, Býra­baıdyń saf aýasyn jutyp, mól­dir sýyna shomylǵysy kele­tin demalýshylardyń ózderi ta­za­lyq máselesine kóńil bólse deısiń.

Aksııaǵa Býrabaı baý­raıy­nyń turǵyndary ǵana emes, oblystyń ózge óńirlerinen de kelgen tabıǵat janashyrlary ortaq iske jumyla kirisip, kóp-kórim eńbek etti.

Mundaı sharýa Kókshetaý qalasynda da uıymdastyryldy. Qalany qaq jaryp ótetin Shaǵa­laly ózeniniń jaǵalaýlary, Qopa kóliniń jıegi tazartyldy. Al Atbasar aýdanyndaǵy No­voselskoe aýlynyń tur­ǵyn­dary Jylandy ózeniniń ja­ǵalaýyn tazartsa, Sergeev selo­lyq okrýginiń turǵyndary Esil ózeniniń qos qaptalyn mun­tazdaı etti. Arshaly aýdanynda da Kishi jáne Úlken Saryoba, Anarkól kólderiniń mańaıy tazartyldy. 12 shaqyrym qa­shyqtyq kórer kózge bir jasaryp qaldy. Tabıǵat janashyrlary alpys tonnadan astam turmystyq qaldyqtardy jınap, polıgonǵa jetkizdi.

Demalys kúnderi 250 myńnan astam aqmolalyqtar tazalyq jumysyna qatysty.

Aqmola oblysy,

Býrabaı aýdany