Foto: inform.kz
«Qazirgi tańda joldarda jol qozǵalysy erejelerin buzý faktilerin tirkeıtin 24 myńǵa jýyq avtomatty kameralar ornatylǵan. Olardyń kómegimen barlyq buzýshylyqtardyń 50 paıyzy tirkeledi. Astana men Shymkentte bul kórsetkish 70 paıyzǵa deıin ósti. Alaıda, ulttyq aýqymda olardyń sany óte jetkiliksiz. Qazirgi ýaqytta ishki ister organdary jol qozǵalysyn kontaktisiz baqylaýdy belsendi túrde qoldanyp jatyr. Jol qozǵalysy erejelerin buzýdy tirkeýdiń stasıonarlyq avtomatty júıeleri joǵary profılaktıkalyq áserge ıe. Biraq olardyń sany eldi mekenderdiń jol jelisin tolyq qamtýǵa múmkindik bermeıdi, al aýyldyq joldarda múlde joq», dedi Qaısar Sultanbaev Ortalyq kommýnıkasııalar qyzmetinde ótken brıfıngte.
Osyǵan baılanysty polıseıler 2019 jyldan bastap ornatylǵan kameralar men radarlarmen jabdyqtalǵan patrýldik kólikterdi paıdalana bastady. Júıe marshrýt boıynsha jol qozǵalysy erejelerin buzýdy avtomatty túrde tirkep, Bas prokýratýranyń ortalyq serverine jiberedi. Alaıda qyzmetkerlerdiń bul aqparatty joıý múmkindigi joq. Qazirgi ýaqytta mundaı kólikterdiń 202 birligi bar. Jyl sońyna deıin taǵy 86 kólikti satyp alý josparlanyp otyr.
«Endi kóshe kameralarynan alynǵan derekterdi taldaı otyryp, júıe ózi jaqyn mańdaǵy polısııa qyzmetkeriniń planshetine qaýipti júrgizýshiniń jaqyn jerde ekenin bildiretin habarlama jiberedi. Osylaısha, polıseıler jol qozǵalysy erejesin óreskel buzǵandardy dereý anyqtaı alady», dep qosty spıker.
Osylaısha, baǵdarlamanyń kómegimen jyl basynan beri jalǵan nómir qoldanýdyń 100-den astam faktisi tirkelip, 700-den astam júrgizýshiniń júrgizýshi kýáliginen aıyrylǵany anyqtaldy. Sondaı-aq 670 kólik nómiri tárkilenip, 5 myńnan astam kólik aıyp turaǵynda turǵany belgili boldy.
Qyrmyzy JUMAǴALIQYZY,
EUÝ stýdenti
