Daryndy balalarǵa arnalǵan mamandandyrylǵan lıseıdiń 10-synyp oqýshylary Ánel Qumqaı men Asqar Ábdirahman izdenis izine túsken. Olar jańa tehnologııa men jasandy ıntellektini paıdalana otyryp, shalǵaıdaǵy eldi meken turǵyndarynyń ómir súrý deńgeıin kóterýge yqpal etetin, ekonomıka men ınfraqurylymdy órkendetýge arnalǵan jobany dúnıege ákelgen.
Oqýshylar keltirgen derekke júginsek, joba arqyly eginshilik pen mal sharýashylyǵyndaǵy kisi kúshin kóp talap etetin jumystar avtomattandyrylmaq. Sondaı-aq «Arduino» platformasy arqyly egin alqabyn avtomattandyrylǵan sýarý júıesimen qamtýǵa den qoıypty. Budan bólek, aǵyn sýdy lastamaý maqsatynda jasandy ıntellekt kómegimen iske asatyn kanaldar ornatylady. Sonymen qatar qoradaǵy tórt túliktiń qıyn tazalap, qoımaǵa jınaý jáne ony egin sharýashylyǵyna tyńaıtqysh retinde qoldanýdy da qarastyrypty.
«Bul jobany aýyl sharýashylyǵyn órkendetý maqsatynda iske asyrýdy jón dep taptyq. Biz energııany tabıǵı jolmen óndirýdiń 3 túrin tańdap otyrmyz. Olar: sý energııasy (gıdroelektrostansa), kún energııasy (kún panelderi), jel energııasy (jel dıirmenderi). Árıne, jobany jan-jaqty oılasa otyryp qolǵa alǵan jaıymyz bar. Birinshi kezekte adam kúshin únemdeý qajettigine den qoıdyq. О́ıtkeni tehnologııa damyǵan ýaqytta kóp jumys avtomattandyrylǵan júıe arqyly júzege asqany jón. Ol barlyǵymyz úshin tıimdi bolmaq.
Bizdiń jobamyz birneshe júıeni qamtıtynyn aıtyp ketken jón. Máselen, aýyl mańyndaǵy ózen nemese kól arqyly gıdroelektrostansa elektr toǵyn óndirse, aýa raıyna baılanysty kún men jel energııasy da qarqyndy óndiriledi. Osy úsh tabıǵı jolmen óndirilgen elektr energııasy negizgi stansaǵa jınalady. Sodan keıin jınalǵan energııa kózi barlyq aýyldaǵy turǵyn úılerdi elektr toǵymen, jylýmen jáne jaryqpen qamtamasyz etedi.
«Arduino» platformasyndaǵy jasandy ıntellektte osy úderistiń barlyǵy avtomattandyrylǵan túrde baqylaýǵa alynady. Sondaı-aq elektrostansadaǵy energııanyń mólsherin de kórsetedi», deıdi jas ónertapqyshtar.
Tarazdyq oqýshylar ózderi oılap tapqan jobanyń aýyz toltyryp aıtarlyqtaı nátıje beretinine bek senimdi. Olar jańa joba laıyqty túrde júzege assa, elimizdegi ýrbanızasııa úderisindegi ózekti máseleler ózdiginen sheshimin tabady dep otyr.
Taraz
