Ortaq iske tabıǵat janashyrlary, qoǵam belsendileri, qaladaǵy kásiporyndar men mekemelerdiń ókilderi qatysty. M.Áýezov, I.Esenberlın, Aǵybaı batyr kósheleriniń boıy, ózen jaǵalaýy, jaz aılarynda jurt shomylatyn jaǵajaı muntazdaı tazartyldy. Qalanyń ortalyǵyna lúp etken samal jelmen terbeletin raýshan gúli men sándik butalar egildi. «Jumyla kótergen júk jeńil» degendeı, birlese istegen soń tilegi bir jandardyń aldyndaǵy sharýa úrkip turmaı ma? Atbasar agrarlyq ındýstrııaldyq kolledjiniń, jastar resýrstary ortalyǵynyń ókilderimen qatar, eriktiler de qalanyń symbatyn keltirýge belsene kiristi.
– Búgin óte qýanyshtymyn. Qaladaǵy eńbektegen baladan eńkeıgen kárige deıin jumylyp eldiń birligin kórsetti. Kóktemgi sý tasqyny kezinde sál búlingen Jabaı ózeniniń jaǵalaýy baǵzy kórkin tapty. Turǵan jerińniń, týǵan ólkeńniń taza bolǵanyna ne jetsin, – deıdi aýdandyq ardagerler keńesiniń tóraǵasy Sabyrjan Musabekov.
2 myńǵa jýyq adam jumys istegennen keıin nátıjeli bolary haq. Aksııanyń basynda ondaǵan tonna turmystyq qaldyq shyǵarylǵan edi. Al sońǵy kúni qala kóshelerinde kóldeneń jatqan bir buraý qaǵys qalǵan joq. Búgingi sharýa el ishindegi aýyzbirliktiń myqty ekenin kórsetip turǵandaı. Taǵy bir aıta keterligi, aýdanda 1 613 kóshet otyrǵyzyldy. Qarttar úıiniń aýlasy tazalandy. Eń bastysy, osyndaı ilkimdi is bir sáttik naýqan ǵana emes, turaqty dástúrge aınalmaq.
Aqmola oblysy,
Atbasar aýdany
