Foto: Semeı qalasy ákimdiginiń baspasóz qyzmeti
26 mamyr kúni saǵat 17:45 shamasynda Abaı aýdany Tótenshe jaǵdaılar departamentiniń pýltine Glınka kóshesi, 35-úıde ornalasqan kópqabatty turǵyn úıdiń tóbesi salbyrap turǵany týraly habarlama kelip túsken. Úı turǵyndary shatyrdyń qulap ketýi múmkin ekenin aıtyp, dabyl qaqqan.
Oqıǵa ornyna jetken qutqarýshylar jalpy 160 sharshy metr shatyrdyń 70 sharshy metri julynyp ketkenin anyqtady. Aıta ketsek, bul úı 1984 jyly salynǵan.
Búgin Semeı qalasynyń ákimi Nurbol Nursaǵatov ákimdiktiń bólim basshylary men Tótenshe jaǵdaılar departamenti basshysynyń orynbasary Qymbat Kópbaevpen kóshpeli keńes ótkizdi.
«Oqıǵa ornynda jıyn ótip, ákim adam ómirine qaýip tóndiretin shatyr bólikterin demontajdap, qalpyna keltirý jumystaryn júrgizýdi tapsyrdy», delingen ákimdik habarlamasynda.
