foto: aikyn.kz
22 sáýirde Epetition.kz platformasynda Qazaqstanda birtutas ýaqyt beldeýin joıý týraly petısııa paıda boldy. Qujat avtorlary elektr energııasyn kóp tutynýdyń saldarynan qarjylyq shyǵyndardyń artýy men densaýlyqqa aıtarlyqtaı zııan keltirilýine baılanysty buryńǵy ýaqyt beldeýine qaıta oralýdy talap etip otyr.
«О́mirlik mańyzdy elektr energııasyn tutynýdyń ortasha esepshoty 2024 jylǵy 1 sáýirdegi esep boıynsha shamamen 17 000 teńgeni qurady. Bolashaqqa boljam jasaıtyn bolsaq, ýaqyttyń ózgerýi bul shyǵyndardy aıtarlyqtaı arttyrady, ásirese kúzgi-qysqy kezeńde yńǵaısyz», delingen túsiniktemede.
Saýda jáne ıntegrasııa mınıstrligi zań boıynsha talap etiletin 50 myń daýys jınaǵan jaǵdaıda petısııany qaraýǵa ýáde berdi. Petısııa jarııalanǵan kúnnen bastap, dálirek aıtqanda 36 kún ishinde qujatqa 37 myń adam qol qoıyp úlgergen.
Esterińizge sala keteıik, Qazaqstan 2024 jyldyń 1 naýryzynan bastap biryńǵaı ýaqyt beldeýine kóshti. Buǵan Saýda jáne ıntegrasııa mınıstrligi bastamashy boldy. Sheneýnikter bul sheshimdi jumysty sınhrondaýmen, búkil el boıynsha birkelki banktik saǵattarmen jáne el turǵyndarynyń bıorıtmderin jaqsartýmen negizdedi. Alaıda, birtutas ýaqyt engizilgennen keıin kóp uzamaı áleýmettik jelide halyq, ásirese elimizdiń shyǵys óńirleriniń, Almaty turǵyndary jappaı shaǵymdana bastady.
Altynaı ABDYSh,
EUÝ stýdenti
