foto: Sputnik / Iosıf Býdnevıch
«Búgin Sizdermen Ǵylym ordasynda jınalyp otyrmyz. Qýanyshtymyn. Bul – qazaq ǵylymynyń qara shańyraǵy. О́zderińiz jaqsy bilesizder, sońǵy kezderi bul ǵımarat ábden tozyp ketti. Sondyqtan men osydan eki jyl buryn bul jerde kúrdeli jóndeý júrgizý jóninde naqty tapsyrma berdim. Sodan beri biraz sharýa atqaryldy. Ishi de, syrty da zaman talabyna saı jańǵyrtyldy. Eń bastysy, ǵımarattyń tarıhı kelbeti saqtaldy. Jyl sońyna deıin bul jumys tolyq aıaqtalady, abattandyrý jumysy júrgiziledi. Jańarǵan Ǵylym ordasy búgingi jáne bolashaq ǵalymdar úshin qyzmet ete beredi», dedi el Prezıdenti.
Sonymen qatar Prezıent bul jerde halqymyzdyń kóptegen kórnekti ǵalymdary eńbek etkenin atap ótti.
«Ǵylym ordasynda esimi el tarıhyna jazylǵan birtýar tulǵalarymyzdyń izi qalǵan. Sondaı ult perzentteriniń biri ári biregeıi – akademık Qanysh Sátbaev. Bıyl ǵalymnyń týǵanyna 125 jyl toldy. Akademık Qanysh Sátbaev elimizdi órkendetýge orasan zor úles qosty. «Ǵalymnyń haty ólmeıdi» degen. Halqymyz áli kúnge deıin onyń ashqan jańalyqtarynyń ıgiligin kórip otyr. Qazir – ǵylym men bilimniń zamany. Otanymyzdy kórkeıtemiz desek, eń aldymen, osy eki salany damytýymyz kerek. Budan basqa jol joq», dedi Memleket basshysy.
