Erekshe balalarǵa – erekshe nazar

Mektep oqýshylary men kolledj stýdentteri arasynda shahmat, toǵyzqumalaq oıyndarynan týrnır, armrestlıng sportynan álem chempıondarymen sheberlik saǵaty jáne «Araldaǵy sırk» merekelik qoıylymy kórsetildi. Sondaı-aq «Túrkistan balalar kózimen» kórkemsýret galereıa­­­sy, 500 oqýshydan quralǵan «Dombyra party» flesh-moby, «Aıbyn» áskerı-patrıottyq qozǵalysy oqýshylarynan quralǵan top óneri kórermen nazaryna usy­nyl­dy. Merekelik is-sharalar óńirdiń barlyq aýdanynda uıym­das­tyryldy. Mysaly, Jeti­saı aýdanynda úıde arnaýly áleýmettik qyzmet kórsetiletin búldirshinderge arnaıy merekelik is-shara ótti. Aýdanda búginde 18 jasqa deıingi 1373 múmkindigi shekteýli bala bar bolsa, onyń 325-i – úıde arnaýly áleýmettik qyzmet kórsetiletinder. Aýdanda múmkindigi shekteýli balalarǵa saýyqtyrý, ońaltý sharalaryn ótkizýge baǵyttalǵan qajetti arnaý­ly áleýmettik qyzmetter keshenin usynatyn arnaıy ortalyqtar jumys istep keledi. Al merekelik is-shara barysynda balalarǵa demeý­shiler tarapynan dastarqan jaıy­lyp, syı-syıapat jasaldy. Aýdan ónerpazdary men merekege qa­tysýshy búldirshinderdiń mere­ke­lik konserttik baǵdarla­ma­lary usynyldy. Saıram aýda­nynda da jumyspen qamtý jáne áleýmettik baǵdarlamalar bóli­miniń «Áleýmettik qyzmet kór­se­tý ortalyǵy» kommýnaldyq memlekettik mekemesiniń úı jaǵ­daıynda qyzmet alýshy búl­dir­shinderi qýanyshqa bólendi. Aýdan aýmaǵyndaǵy 100-ge jýyq erekshe bala ata-anasymen birge Shymkent qalasyndaǵy «Zoobaq», «Qııal álemi» demalys oryndary men «Shymkent sity mall» Play park oıyn-saýyq ortalyqtaryn aralady. Túrli jan-janýarlardy tamashalap, kóńilderin sergitip qaıtty. Balalarǵa arnaıy syılyqtar da berildi. Uıymdastyrýshylar erekshe bala­lardyń mundaı merekelik sharaǵa jıi qatysýy olardyń áleýmettik ortaǵa beıimdelýi men jeke qabiletteriniń ashylýyna aıryqsha septigin tıgizetinin aıtady. Osy arada aıta ketelik, oblystyq jumyspen qamtý jáne áleýmettik baǵdarlamalar basqarmasy taratqan málimetter boıynsha óńirde 110 myńnan astam adamy bar 27 myń otbasy AÁK alady. Osy otbasylarda 70 myńnan asa bala tárbıelenip otyr. Oblys bo­ıynsha az qamtylǵan otbasylarda 1–6 jas aralyǵyndaǵy 48,7 myń bala bar. Olarǵa ótken jyly 1 mlrd 695,2 mln teńge kóleminde qosymsha áleýmettik tólem taǵaıyndaldy.

О́ńirde jazǵy saýyqtyrý lager­­­lerinde 35 myńnan astam bala áleýmettik jaǵdaıyna baıla­nys­ty bıýdjet esebinen, 20 myńǵa jýyq oqýshy ata-analar ese­binen aqy­ly demalady. Sony­men qatar «Qazaqstan halqyna» qory esebinen oblysta 3421 oqýshy jazǵy saýyqtyrý lagerlerimen tegin qamtylady. Jalpy, jaz mezgilinde oblys boıynsha 22 saýyqtyrý lageri qyzmet kór­set­pek. Balalardyń jazǵy demalysyn uıymdastyrýda arnaıy daıyndyqtan ótken 14 444 pedagog qyzmetker jumys isteıtin bolady. Joǵary oqý oryndary men jastar ortalyqtarynan 95 volonter, 80 kolledj stýdenti dýaldyq bilim sheńberinde tar­tylady. Qala syrtyndaǵy la­gerler maýsym aıynyń birin­shi onkúndiginde ashylyp, jaz boıy 6–8 aýysymda qyzmet kórsetedi. Sondaı-aq Túlkibas pen Tólebı aýdandaryndaǵy «Samal» jáne otbasylyq úlgidegi balalar aýly lagerinde jetim jáne ata-anasynyń qamqorlyǵynsyz qalǵan 152 tárbıelenýshi jaz boıy demalady. Tártibi boıynsha mektepishilik jáne polısııa esebinde turatyn 1100 oqýshy Tólebı aýdanynda ornalasqan «Taý barysy» lagerinde bolady. Al 266 oqýshy «Baldáýren» jáne «Bóbek» respýblıkalyq oqý-saýyqtyrý lagerlerinde tyny­ǵady. Oqýshylar úshin mádenı-aǵartýshylyq, áskerı-patrıot­tyq jáne sporttyq baǵyt­ta 83 ob­lystyq is-shara tizbesi bekitil­gen.

Túrkistan oblysy