Kelisimge Sabın Kler men Sátbaev Ýnıversıtetiniń halyqaralyq yntymaqtastyq jáne strategııalyq damý jónindegi birinshi prorektory Samǵat Ermekbaev qol qoıdy. Osy kelisimge sáıkes, Sátbaev Ýnıversıtetiniń stýdentteri úshinshi kýrsty aıaqtaǵan soń, Pensılvanııa shtatynyń ýnıversıtetinde oqýlaryn jalǵastyrady, sóıtip bes jyl oqý ishinde Penn State shtatynyń bakalavr jáne magıstr dárejesin alyp shyǵady. Bul rette myna mamandyqtar boıynsha mamandandyrylǵan oqytý baǵdarlamalaryna erekshe nazar aýdarylady: kıberqaýipsizdik, munaı ınjenerııasy, materıaltaný jáne geologııa.
«Penn State óz tarıhynda alǵash ret áriptesterine mundaı ókildi delegasııany jiberip otyrǵanyn atap ótkim keledi. Biz birge iske qosqaly otyrǵan bilim berý baǵdarlamasy Sátbaev Ýnıversıteti úshin arnaıy ázirlengen jáne óz túrinde óte erekshe bolyp sanalady. Degenmen, biz munymen toqtap qalmaımyz, biz ǵylymı yntymaqtastyqty, akademııalyq utqyrlyq baǵdarlamalaryn ári qaraı damytamyz, sonymen qatar «3+1+1» formaty boıynsha bilim berý baǵdarlamalarynyń tizimin ulǵaıtý múmkindigin qarastyramyz. Sondaı-aq bıylǵy jyly «Bolashaq» baǵdarlamasy boıynsha 12 ǵalymymyzdy, «3+1+1» baǵdarlamasy boıynsha 18 stýdentti ǵylymı taǵylymdamadan ótýge jiberýdi josparlap otyrmyz, bul ýnıversıtetimizdiń stýdentteri men ǵylymı qyzmetkerlerine jańa belesterdi baǵyndyrýǵa jol ashady», dedi Samǵat Ermekbaev.
Sátbaev Ýnıversıteti – Qazaq ulttyq tehnıkalyq zertteý ýnıversıteti halyqaralyq seriktester sheńberin keńeıtý úshin, aǵylshyn tilinde bilim berý baǵdarlamalaryn engizýde, sonymen qatar QS reıtınginde úzdik 100-ge kiretin taǵy úsh ýnıversıtetpen akademııalyq bilim almasýǵa jáne qos dıplomdyq baǵdarlamalardy qurýǵa qatysady. Olar: Sungkyunkwan University (Ońtústik Koreıa), City University of Hong Kong (Gonkong, Qytaı) jáne Hof University of Applied Sciences (Germanııa). Osy maqsatta sheteldik professorlar shaqyryp, basqa elderden qabyldanǵan stýdentter sanyn ulǵaıtýda. Sátbaev Ýnıversıtetine bıyl túsetin barlyq stýdentter osy qos dıplomdyq baǵdarlamalarǵa qatysýǵa ótinish bere alady. Kezdesý barysynda talqylanǵan basty taqyryptardyń biri – Penn State fılıalyn ashý máselesi boldy, bul Sátbaev Ýnıversıteti basshylyǵynyń alǵa qoıǵan basty maqsaty.
«Álemdegi tórt úzdik ýnıversıtetpen birge qurylǵan bizdegideı baǵdarlama Qazaqstannyń basqa eshbir ýnıversıtetinde joq», dep atap ótti Sátbaev Ýnıversıtetiniń halyqaralyq yntymaqtastyq jáne strategııalyq damý jónindegi birinshi prorektory Samǵat Ermekbaev.
Sapar barysynda Penn State ýnıversıtetiniń ókilderi «Bolashaq» baǵdarlamasy boıynsha shákirtaqy alǵan zertteýshilermen, sondaı-aq akademııalyq utqyrlyq baǵdarlamasyna qatysýǵa úmitker stýdenttermen kezdesti.
«Qazaqstan óte tamasha el, al Sátbaev Ýnıversıteti biz úshin strategııalyq mańyzdy seriktes. Biz 3+1+1 formýlasy boıynsha akademııalyq salada ǵana emes, ǵylymı-zertteý salasynda da yntymaqtastyqqa daıynbyz. Biz sondaı-aq akademııalyq utqyrlyq aıasynda stýdenttermen almasýǵa múddelimiz», dep atap ótti PennState Global provost orynbasarynyń mindetin atqarýshy.
Pensılvanııa memlekettik ýnıversıteti – QS álemdik reıtınginde 83-orynda turǵan AQSh-tyń memlekettik zertteý ýnıversıteti. Ýnıversıtet Aıvı Lıgasynyń ýnıversıtetterimen salystyrýǵa bolatyn joǵary sapaly bilim beredi. Ýnıversıtettiń endaýment qorynyń kólemi 4,55 mıllıard AQSh dollaryn quraıdy.
