Fotolar: disk.yandex.kz
Festıval aıasynda 5-shi Dúnıejúzilik kóshpeliler oıyndary stılinde bezendirilgen Qazaqstan tikken kıiz úı tamashalandy.
4 kún ótetin festıvalde qazaq balýandary Birjan Qosalıev pen Syrym Izbasarov aýdaryspaq sporty boıynsha óner kórsetti. Qos balýan da – Qazaqstannyń jáne Azııanyń birneshe dúrkin chempıony, sondaı-aq 2-shi Dúnıejúzilik kóshpeliler oıyndarynyń jeńimpazdary. Sonymen qatar Narıman Ásimjan men Azat Túlkibaı Túrkııa tórinde ulttyq sportymyz teńge ilýdi tanystyrdy.
Festıval sheńberinde Búkilálemdik etnosport konfederasııasynyń prezıdenti Nedjmettın Bılal Erdoǵan ulttyq sport federasııalarynyń basshylarymen kezdesti.
Kezdesý barysynda QR Ulttyq sport qaýymdastyǵynyń prezıdenti Islambek Saljanov: «5-shi Dúnıejúzilik kóshpeliler oıyndaryna daıyndyq qarqyndy júrip jatyr. Qazirgi ýaqytta oǵan 84 memleket qatysatynyn rastady. Biz barlyq eldiń delegasııasyn qyrkúıekte dúbirli dodany tamashalaýǵa shaqyramyz», dedi.
Búkilálemdik etnosport konfederasııasy dástúrli sport túrlerin saqtaı otyryp, olardy damytý maqsatynda atalǵan festıvaldi 6-shy jyl qatarynan ótkizip keledi.
