Foto: Ashyq derekkóz
«Meniń oıymsha, búgin qol qoıylǵan «Balqash» atom elektr stansııasyn salýǵa qatysty kelisimderdiń strategııalyq mańyzy zor. Osy aýqymdy jobany batyl qoldaǵany úshin Reseı Federasııasynyń Prezıdentine rızashylyǵymdy jetkizemin. Bul bastama ǵylym-bilim, tehnologııa salalaryndaǵy yqpaldastyqty ilgeriletip, energetıka men ındýstrııaǵa qatysty aralas baǵyttardyń damýyn qamtamasyz etedi. Qazaqstan men Reseı úshin energııa resýrstaryn jáne elektr energııasyn óndirý, tasymaldaý, ishki ári syrtqy naryqtarǵa jetkizý máselelerin tabysty sheshýdiń máni zor. Eýrazııadaǵy kólik baılanysy kóbine bizdiń elderimizge táýeldi. Qazaqstan men Reseı Soltústik – Ońtústik, Shyǵys – Batys qurlyqaralyq dálizderin damytý jolynda jemisti jumys atqaryp jatyr. Tarıfterdi ońtaılandyrý, ákimshilik rásimderdi qysqartý, shekara mańyndaǵy jáne basqa da ınfraqurylymdy jańǵyrtý úshin júıeli sharalar qabyldanǵany qýantady. Sonyń nátıjesinde júk tasymaly turaqty túrde artyp keledi, byltyrǵy qorytyndy boıynsha 92 mıllıon tonnaǵa jetti. Bul shamamen 3,4 paıyz ósimdi quraıdy», dedi Prezıdent.
Atalǵan kórsetkishterdi ulǵaıtý josparlanǵan. Memleket basshysy ol úshin ozyq sıfrlyq sheshimder men jasandy ıntellekt tehnologııalaryn engiziletinin atap ótti.
«Memleketterimiz arasynda júrgizýshisiz júk kólikteriniń qozǵalysyn iske qosý – osy istiń jarqyn mysaly. Ǵarysh salasyndaǵy yntymaqtastyqtyń keleshegi zor. «Baıqońyr» kosmodromy kóp jyldan beri jemisti ǵylymı-tehnıkalyq seriktestigimizdiń sımvoly retinde qyzmet etip keledi. «Báıterek» birlesken jobasynyń júzege asyrylýy, sonyń ishinde jaqynda «Suńqar/Coıýz-5» jańa zymyran tasyǵyshynyń sátti ushyrylýy ǵarysh qyzmetin usynatyn halyqaralyq naryqtaǵy elderimizdiń pozısııasyn nyǵaıtýǵa jol ashady», dedi Memleket basshysy.
Qasym-Jomart Toqaev Qazaqstanǵa tórt Amýr jolbarysynyń ákelinýin Reseı Prezıdentiniń memlekettik sapary aıasyndaǵy aıtýly oqıǵa dep atady.
«Qurmetti Vladımır Vladımırovıch, Qazaqstan aýmaǵyna jolbarystardy jersindirý jónindegi bastamamyzǵa qoldaý kórsetkenińiz úshin Sizge shynaıy alǵys aıtamyn. Baǵaly syıyńyz týraly el azamattarynyń barlyǵy keńinen qulaǵdar boldy. Osy ıgi iske atsalysqan eki eldiń mamandaryna rızashylyǵymdy bildiremin», dedi Prezıdent.
Eske salaıyq, keshe Reseı Prezıdenti Vladımır Pýtın Qazaqstanǵa memlekettik saparmen keldi. «Egemen Qazaqstan» gazetinde Vladımır Pýtınniń «Reseı – Qazaqstan: Eýrazııa tórindegi odaq» atty maqalasy jarııalandy.
