Sýretti túsirgen – Iаsıpa Rabaeva
Bıylǵy sý tasqyny kezinde Oral qalasy qapshyq-qapshyq qum, úıilgen topyraqqa tolyp ketti. Jaǵalaýdy bekitý úshin myńdaǵan adam, júzdegen tehnıka damylsyz jumys istep, qalany qorǵap qaldy. Ol kezde qalanyń kóshe-jol jelisin, aýla-aýmaqtaryn tazartý, abattandyrý jáne kógaldandyrý isi keıinge shegerildi.
Alaıda tasqynnyń beti qaıtyp, ómir aǵysy qalypty jaǵdaıǵa túsken soń, ıaǵnı bıylǵy 22 sáýirden bastap oblys boıynsha sanıtarlyq tazalyq aılyǵy jarııalanyp, apta saıyn senbilik ótkizilip keledi.
Josparǵa sáıkes «Taza Qazaqstan» respýblıkalyq ekologııalyq aksııasy jyl sońyna deıin jalǵasady.
Búginge deıin aksııaǵa óńirde 90 myńnan asa turǵyn jáne 3 myńnan asa mekeme-kásiporyn qatysqan.
«Oblystyń túrli eldi mekeninde 44 myńnan asa aǵash-kóshet otyrǵyzylyp, memlekettik orman qorynyń 1,5 myń gektaryna 3,3 mln dana jasyl jelek egildi. Negizi bıylǵy jospar 14,7 mln dana bolsa, qalǵan 11,4 mln dana jelek kúz mezgilinde egiledi», deıdi Batys Qazaqstan oblysy Energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáı.
Sanıtarlyq tazalyq aılyǵy aıasynda barlyǵy 60 myń aýla, 2,5 myńnan asa kóppáterli turǵyn úı men 60 myń jeke turǵyn úı, 231 saıabaq pen tynymbaq tazalanyp, jınaqtalǵan. Sondaı-aq 2 717 sharshy metr trotýar jóndelip, aýystyrylypty. 165 sý nysany tazartylǵan. Onyń ishinde ózen-kólder men jasandy sý aıdyndarynyń aýmaǵy – 9 807 sharshy metr bolsa, 55 sýburqaq pen uzyndyǵy 134 017 metr bolatyn aryqtar tazalanyp, retke keltirilgen.
Senbilik kezinde 1 myńnan asa áleýmettik nysan, 3 myń ónerkásip obektisi, 525 tarıhı-mádenı eskertkish qamtylǵan. Tazalyq jumysyna 900-den asa tehnıka jumyldyrylyp, 16 myń tonna turmystyq qaldyq arnaıy polıgondarǵa shyǵarylǵan.
Eldi mekenderdi sanıtarlyq tazartý maqsatynda 31 mamyrda oblystyq jalpy senbilik uıymdastyrylǵan edi. Al 5 maýsym – Dúnıejúzilik qorshaǵan ortany qorǵaý kúnine oraı ekologııalyq senbilik ótti.
«Sý tasqynynan keıin ózen arnalary men aýmaqtardy qoqystan tazalaý maqsatynda shilde aıynda «Taza jaǵalaý», qyrkúıek aıynda «Taza orman» aksııalaryn ótkizýdi josparlap otyrmyz» deıdi «Taza Qazaqstan» respýblıkalyq aksııasynyń óńirdegi kýratorlarynyń biri, oblystyq Tabıǵı resýrstar jáne tabıǵat paıdalanýdy retteý basqarmasynyń basshysy Marat Moldashev.
«Memleket basshysynyń bastaýymen qolǵa alynǵan «Taza Qazaqstan» ekologııalyq aksııasyn batysqazaqstandyqtar biraýyzdan qoldap, belsendi qatysady. Sebebi bizdiń týǵan qalamyz ejelden «jasyl qala» degen ataqqa ıe. Osy ataqqa laıyq bolyp, ár aýylda tazalyq jumysyn júrgizýimiz kerek. Bizdiń maqsatymyz úıimizdi, aýlamyzdy, turǵan jerimizdi taza ustaý», dedi jalpyhalyqtyq senbilikke qatysqan oblys ákimi Narıman Tóreǵalıev.
Batys Qazaqstan oblysy
