Fotolar: Ulttyq ulannyń baspasóz qyzmeti
Saltanatty is-sharada magıstranttardy quttyqtaǵan Qorǵanys mınıstriniń birinshi orynbasary general-leıtenant Sultan Qamaletdınov: «Táýelsiz elimizdiń armııasy qurylǵan kúnnen bastap normatıvtik-quqyqtyq bazany qalyptastyrý, uıymdyq-shtattyq qurylymdy ońtaılandyrý jáne áskerlerdi tehnıkalyq jaraqtandyrý máselerine erekshe den qoıyp keledi. Sonymen qatar, áskerı kadrlardy daıyndaýdyń kóp deńgeıli júıesin qurý – basym baǵyt bolǵanyn atap ótken jón. Bul qadam búginde ózin tolyqtaı aqtap, oń jemisin berip otyr!», dedi.
Atalǵan joǵary áskerı oqý orny jyl saıyn jedel-strategııalyq jáne jedel-taktıkalyq basqarý býyndaryna mamandar daıyndap shyǵarady. Ulttyq qaýipsizdik jáne áskerı ister magıstri dárejesine ıe bolǵan 158 ofıserdiń 23-i Qazaqstan Respýblıkasy IIM Ulttyq ulanynan jiberilgen edi. Olar magıstratýralyq bilim berý baǵdarlamasyna sáıkes, teorııalyq oqytýdan bólek, áskerı taǵylymdamanyń tolyq kýrsynan ótti.
Ishki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanov shyǵarylym saltanatynda ofıserlerdi jańa statýstarymen quttyqtady.
«Tól áskerimizdiń qatary magıstrlik bilimi bar ofıserlermen tolyǵyp otyr. Elimizdegi eń bedeldi áskerı oqý ornynan alǵan bilimderińiz ben biliktilikterińizdi Ulttyq ulannyń aldyna qoıylǵan mindetterdi oryndaý barysynda ońtaıly qoldanasyzdar dep senemin», dedi Bas qolbasshy.
Ulttyq qorǵanys ýnıversıtetiniń Ulttyq ulan fakýltetin 2023 jyldyń aqpan aıynan beri polkovnık Saverdın Imırov basqarady. Saverdın Karlovıch fakýltettiń bıylǵy, ıaǵnı on birinshi shyǵarylymyna qatysty oıymen bólisti.
«Magıstranttar áskerdi operatıvti taktıkalyq basqarý jáne qyzmettik-jaýyngerlik qyzmetin qamtamasyz etý kafedralarynda bilim aldy. Birinshi atalǵan kafedrada batalonnan bastap joǵary deńgeıdegi komandırler oqytylsa, ekinshi kafedrada tárbıe jáne áleýmettik-quqyqtyq jumystar, tyl, tehnıka jáne qarý-jaraq ofıserleri biliktilikterin shyńdady. Olar endi Ulttyq ulan Bas qolbasshylyǵy basqarmalarynda, óńirlik qolbasshylyq basqarmalarynda ofıserlik, aǵa ofıserlik laýazymdarǵa taǵaıyndalady, polk komandırleriniń orynbasary, shtab bastyqtary qyzmetin atqarady. Akademııaǵa da eki ofıser ketip jatyr, biri oqytýshy bolyp, ekinshisi oqý batalonynyń komandıri retinde. Bárine sáttilik tileımin», dedi fakýltet basshysy.
«Búgin zamanaýı ofıserler, bolashaq áskerı basqarý organdarynyń basshylary oqý ornyn bitirip otyr. Osy sanattan tabylǵanyma óte qýanyshtymyn. Ulttyq ulandyq túlekter arasynda Bas shtab akademııasynyń, doktorantýranyń jáne arnaıy daıyndyq kafedrasynyń ofıserleri de bar. Búgin olar Bas qolbasshy qolynan dıplom aldy. Bilim ordasynda zaman talabyna saı kásibı jetilý, ásker bólinisterin zamanaýı basqarý júıesin meńgerý úshin barlyq jaǵdaı jasalǵan», deıdi túlektiń biri, О́skemen qalasyndaǵy 3477 áskerı bóliminiń burynǵy komandıri podpolkovnık Azamat Seıilhanov.
Saltanatty is-shara Qorǵanys mınıstrligi men IIM Ulttyq ulany ónerpazdarynyń konserttik baǵdarlamasymen aıaqtaldy.
