KazChess/Qazaqstan shahmat federasııasy, Týrızm jáne sport mınıstrligi, Azııa shahmat federasııasy, Almaty qalasy ákimdiginiń uıymdastyrýymen ótip jatqan chempıonattyń bas seriktesi – «Freedom Holding Corp.» kompanııasy.
10-20 maýsym aralyǵynda halyqaralyq deńgeıdegi shahmat týrnırleri arasyndaǵy rekordtyq kórsetkishke ıe bolǵan chempıonatta álemniń 34 elinen kelgen 7-18 jas aralyǵyndaǵy 650-ge jýyq jas shahmatshy klassıka, rapıd jáne blıs boıynsha baq synasatyn bolady.
«Osyndaı bedeldi týrnırdi ótkizý bizge degen joǵary senimdi kórsetedi ári Azııa shahmat federasııasyndaǵy ustanymymyzdy nyǵaıtýǵa múmkindik beredi. Chempıonat el shahmatyn, jańa esimderdi tanytýǵa, jas shahmatshylarymyz úshin baıypty básekelestik tájirıbe jınaýǵa tamasha múmkindik týǵyzady dep senemiz. Bizdiń komanda týrnırdi sapaly uıymdastyryp qana qoımaı, qonaqtarǵa Qazaqstannyń mádenıeti men dástúrin, sondaı-aq Almatynyń kórkem tabıǵatymen tanysýǵa múmkindik beretin qyzyqty sharalarmen tolyqtyrýǵa barynsha tyrysty», dep atap ótti Qazaqstan shahmat federasııasynyń prezıdenti Tımýr Týrlov.
KazChess birinshi vıse-prezıdenti, Azııa shahmat federasııasynyń vıse-prezıdenti, grossmeıster Dármen Sádýaqasovtyń aıtýynsha, 26-jasóspirimder arasyndaǵy Azııa chempıonaty Irannan Jańa Zelandııaǵa deıingi keńistikti qamtyp, shahmat álemindegi úrdisterdi jarııa etetin mańyzdy oqıǵaǵa aınalyp otyr. Búginde tájirıbe kórsetkendeı, Azııa chempıonattary bolashaq shahmat juldyzdaryn álemge tanymal etetin kásibı alańǵa aınalyp úlgerdi. Bul chempıonat 200-ge jýyq jas shahmatshy úshin qyrkúıek aıynda Býdapeshte ótetin Dúnıejúzilik shahmat olımpıadasyna ashylǵan úlken qaqpa ispetti.
Chempıonatqa qatysýshylardyń arasynda halyqaralyq sheberler – jaqynda úshinshi grossmeısterlik normany oryndaǵan Qazaqstannan Aldııar Ansat jáne Úndistannan Sýresh Harsh U18 sanatynda baq synaıtyn bolsa, halyqaralyq dárejedegi sheberler – Qazaqstannan Amına Qaıyrbekova, О́zbekstannan Maftýna Bobomýrodova qatysyp, U18 bir sanatynda oıynǵa qatysatyn bolady. Bıyl Álem chempıony ataǵy úshin saıysatyndar qatarynda 2018 jyly Taılandta ótken 12 jasqa deıingi Azııa chempıonatynda bes altyn medal ıelengen úndi grossmeısteri Gýkesh Dommaradjý, sonymen qatar shahmattan áıelder arasyndaǵy halyqaralyq sheber, 2022 jylǵy álem chempıonatynyń 16 jasqa deıingi kúmis júldegeri Ngýen Hong Nıýng bar. Chempıonatqa erler arasynda 24 jáne áıelder arasynda 11 FIDE sheberi qatysyp jatyr.
Qazaqstan shahmat federasııasynyń atqarýshy dırektory Gúlmıra Dáýletova Azııa chempıonatyna qatysyp jatqan respýblıkanyń talantty jas shahmatshylaryna sáttilik tileı otyryp, olardyń halyqaralyq chempıonattaǵy jetistikterine toqtaldy. «Bizdiń jas shahmatshylarymyz byltyr Birikken Arab Ámirlikterinde ótken chempıonatta jalpy komandalyq esepte 3-oryndy ıelendi. Olar Qytaı, Úndistan, Reseı sııaqty shahmat sporty jaqsy damyǵan elderdiń shahmatshylarymen teń dárejede oıyn kórsetip, elimizdiń bedelin halyqaralyq dodalarda bıikterden kórsetip júr. Respýblıkalyq shahmat federasııasy tarapynan 45 shahmatshyǵa grant bólinip, olar kásibı jattyqtyrýshylar daıyndyǵynan ótti. Búginde respýblıkada shahmat kásibı deńgeıde ǵana emes, qoǵamdyq sport túrinde damyp keledi. Bul baǵytta Respýblıkalyq shahmat federasııasy byltyr el óńirlerinde 20 fılıal ashyp, «Shahmat kerýeni» jobasyn júzege asyrǵan bolatyn. Al bıyl osy sharalar jalǵasyn taýyp, shahmattan «Senat Open» týrnıri ótip jatyr. Aldaǵy ýaqytta da elimizde shahmat týrnırleri jalǵasyn taba beretin bolady», dep atap ótti federasııa ókili.
26-jasóspirimder arasyndaǵy Azııa chempıonaty taza ekologııa jáne turaqty damý uranymen ótip jatyr. Týrnır qatysýshylary qoldanylǵan barlyq plastık túrlerin arnaıy veloshrederde qaıta óńdeýden ótkizip, jeńimpazdarǵa syıǵa tartylǵan kýbokterdiń qaıta óńdelgen ónimderden jasalǵanyna kópshiliktiń nazaryn aýdaratyn bolady. Bul óskeleń urpaqty qorshaǵan ortanyń damýyna úles qosýǵa, tabıǵatty aıalaýǵa úndeıdi.
Álemniń shahmat jankúıerleriniń nazary aýyp otyrǵan chempıonatty «Kazsport» arnasynyń saıtynan, sondaı-aq Balýan Sholaq atyndaǵy sport keshenine kelip tamashalaýǵa bolady.
ALMATY
