Kollajdy jasaǵan – Qonysbaı ShEJIMBAI, «EQ»
«Áke kórgen oq jonar» degendeı, bilikti azamat zor tabys ákeletin sharýashylyqty tek baıýdyń kózine aınaldyrmaı, agrofırmanyń joǵary tehnologııasyn odan ári damytyp, oblystaǵy eń ónimdi, joǵary damyǵan sharýashylyq qalyptastyryp jatyr.
«Atasy jaqsy qandaıdy...» demekshi, úlken Gennadıı marqumnyń nemeresi, ekinshi Gennadııdiń uly Ivan da ákesiniń baılyǵyn shashyp, álem kezip qydyryp ketpeı, ınstıtýt bitirgen soń, sharýashylyqqa oralyp, qazir bas ınjener bolyp júr.
Jerdi kútýdiń, tyńaıtýdyń ne túrli ozyq ádisin, tuqymdy, óskindi baptaı bilýdiń úzdik tásilderin ıgergen bul fırma kem degende gektarynan 25 sentnerden astyq alyp keledi. Kúzdiń qara jańbyrynda dymdanǵan astyqty barynsha qurǵata alatyn, qýaty zor keptirgish agregattary da bar. Astyqty eshqaıda tasymaı, ózderi turǵyzyp alǵan 320 myń tonnalyq mını elevatorlarda saqtaıdy. Bıdaıdy jeke dıirmende ushyryp, ábden tazalaıdy. Nandy da naýbaıhanalarynda pisirip, tolyp jatqan azyq-túlik dúkenderiniń júıesi arqyly satyp otyrady. Kartoptyń da joǵary surpyn ósirip, ony eń ozyq golland tehnologııasymen óńdep, gektarynan jyl saıyn 300 sentnerden ónim alyp keledi. Sonymen qatar raps, pııaz, qyzylsha, sábiz de ósiredi.
Sharýashylyqtyń ekinshi qyry sútti sıyr ósirýge baǵyttalǵan. Bul iste de kommandıttik seriktestik – oblystaǵy eń ozyq sharýashylyq. Munda osy zamanǵy joǵary tehnologııaly sút kesheni salynǵan. Myń sıyrǵa arnalǵan eki fermadaǵy sút saýý «Karýsel» atty blokpen iske asyrylady. Asyl tuqymdy sıyrdyń bári de jylyna 6–8 myń lıtr sút beredi. Sharýashylyqtyń óz sút zaýytynda súttiń 40 túri shyǵarylady. Barlyq ónimniń sapasyn bir sátte kemitpeı, Petropavl, Kókshetaý, Astanadaǵy dúkenderge ýaqtyly jetkizip otyrady. Tutynýshylar «Zenchenko ı K» belgisi kórsetilgen ónimdi japa-tarmaǵaı alyp jatady. Halyq bul fırma ónimderiniń barynsha sapaly, qospasy az bolatynyna ábden kóz jetkizgen.
Sharýashylyq keıingi ýaqytta Germanııa mamandarynyń jobasymen barlyq jumys úderisi avtomattandyrylǵan sút zaýytyn da saldy. Sharýaqor basshylar elektr qýatyn únemdeý úshin 2012 jyldan beri elektrdi jelden óndiretin qurylǵylar da ornatyp alǵan. Sondyqtan fırma elektr qýatyn artyq tóleımiz dep alańdamaıdy.
Jýyrda sharýashylyqqa oblys ákimi Ǵaýez Nurmuhambetov arnaıy baryp, halyqpen júzdesti. Ákim aldymen ataǵy aspanǵa shyqqan sharýashylyqtyń áleýmettik nysandaryn aralady. Qazirgi ýaqytta «Zenchenko ı K» quny 120 mln teńge bolatyn, fýtbol, voleıbol, basketbol oınaıtyn arnaıy alańdary bar sport kesheniniń qurylysyn júrgizip jatyr. Qurylys jumystaryn tamyz aıynda aıaqtaý josparlanǵan. Novonıkolsk aýyldyq okrýginiń ákimi Elena Zaharova oblys ákimine sporttyq alańdy tanystyryp, onyń aýmaǵynda jastar ǵana emes, barlyq turǵyn seıil quryp, demalyp júrýine jaǵdaı jasalatynyn aıtty.
Ákim tanysqan ekinshi áleýmettik nysan – syrty ásem bezendirilgen balabaqsha. Munda qazir 96 bóbek tárbıelenedi. 27 adam qyzmet isteıdi. Balabaqsha janyndaǵy mektep úıi de jutynyp tur. Ony jóndep, jańǵyrtýǵa sharýashylyq 280 mln teńge bólgen. Tómengi synyptardaǵy 360 oqýshy sharýashylyq esebinen tegin tamaqtanatyn kórinedi. Buǵan fırma jyl saıyn 27 mln teńge bólip otyr.
«Balabaqsha men mektep jarqyrap tur. Árbir synyp bólmesi joǵary talappen jabdyqtalǵan. Qala mektepteriniń keıbirinde mundaı joq», dedi aımaq basshysy.
Sonymen qatar óńir basshysy jumysshylarǵa arnalǵan turǵyn úılerdi, áleýmettik jáne sport nysandaryn aralady.
Aýyl ortalyǵyndaǵy jańadan salynǵan «Nash» dúkeninde negizinen sharýashylyqta óndiriletin et, sút, nan ónimderi tur. Odan keıin oblys ákimi bastaǵan toptyń sapary sharýashylyqtyń kókónis saqtaý qoımasy men elevatorǵa jalǵasty. Al kompanııanyń jańadan salynyp jatqan sút fermasyna kelgende sensasııalyq jańalyq kútip tur eken. Sharýashylyqtyń bas dırektory Gennadıı Zenchenko jańadan turǵyzylyp jatqan sút kesheni Qazaqstanda ǵana emes, Ortalyq Azııadaǵy alpaýyt kásiporyn ekenin aıtty. 9 mlrd teńgege salynyp jatqan keshende bir mezgilde 8 myń tuıaq sıyr kútiledi. 7 keshennen turatyn, árqaısysynda 1,3 myń tuıaqqa deıin kútiletin ferma 2025 jyly paıdalanýǵa berilmek.
«Bul ortalyqta rotorly sút saýý apparaty ornatylady. Ol bir saǵatta 700 sıyrdy saýyp úlgeredi. Bul bizdiń ýaqyt únemdeýimiz úshin óte paıdaly», deıdi Gennadıı Gennadıevıch.
Soltústik Qazaqstan oblysy
