Jarystyń alǵashqy kúni mergender «Azııa» stıli boıynsha synǵa tústi. Bul saıystyń ereksheligi – araqashyqtyǵy 30 metr bolatyn sharshy pishindi tórt burysh úsh nysana qoıylady. Onyń birinshisiniń beti batysqa qaraı buryp ornalastyrylsa, ortańǵy nysana tike qarap turady. Úshinshi nysana ádettegindeı birinshi nysanaǵa qarsy betin shyǵysqa buryp turady. Árbir nysanaǵa oqtyń daryǵanyna qatysty upaı beriletin ólshemderi bar. Bul stıl boıynsha mańǵystaýlyq mergen Oraz Aıbek jeńimpaz atanyp, altyn medal ıegeri atansa, ekinshi jáne úshinshi oryndardy qyzylordalyq Mahanbet Nurman men qaraǵandylyq mergen Oralhan Nurasyl bólisti.
Al saıystyń kelesi túri «Túrik» stıli sarapqa salyndy. Bul stıldiń ereksheligi – mergender bir-birine uqsamaıtyn eki nysanaǵa kezek-kezek oq jiberip myqtyny anyqtady. Áýelgi nysana «qıǵash atý» dep atalsa, kelesisi «qabaq atý» degen mánge ıe eken. Bul stıldiń bas mergeni retinde almatylyq óren Sársenbaı Erǵazy tanylsa, ekinshi oryn jambyldyq jas Babajan Berikbolsynǵa buıyrdy. Úshinshi júldege qaraǵandylyq Oralhan Nurasyl ıe boldy.
Chempıonattyń úshinshi kezeńinde mergender «Majar» stıli boıynsha saıysty. Bunyń ereksheligi – bir-birine irgesi japsarlas dıametri 90 sm bolatyn úsh nysana qatar qoıylyp, mergender ony atpen shaýyp kele jatyp atady. Qansha oq jumsaısyz oǵan shekteý joq. Tek oq jiberýge arnalǵan 100 metrlik qashyqtan shyqpaý kerek. Bul saıysqa qatysqan 32 mergenniń ishinen túrkistandyq Lesbek Ǵumyr altyn medaldi jeńip alsa, qyzylordalyq Ashan Zańǵar kúmis, mańǵystaýlyq Ádilgereı Aıdar qola medal ıegeri atandy.
Jarystyń qorytyndy kezeńinde ózimizdiń «Jamby atý» stıli sarapqa salyndy. Bul stıldiń erekshelegi – bıiktigi jylqynyń boıyna shaq keletin arasy 10 metr úsh baǵana ornatylyp, onyń basyna úsh túrli (altyn, kúmis, qola) jamby-nysana ilinip qoıyldy. Mergender osy úsh nysandy atyp saıysady. Bul stıl boıynsha túrkistandyq mergen Lesbek Ǵumyr jeńimpaz atansa, ekinshi oryn taǵy bir túrkistandyq sportshy Sovethan Raýanǵa, úshinshi oryn aqmolalyq Baızulla Eraslanǵa buıyrdy.
