Ekonomıka • 13 Maýsym, 2024

Qazaqstanda gaz baǵasy kóterilýi múmkin

190 ret

kórsetildi

2 mın

oqý úshin

Energetıka mınıstrligi 1 shildeden bastap gaz baǵasyn kóterýdi josparlap otyr. Vedomstvonyń baspasóz qyzmeti bul sheshimge qatysty túsinikteme berdi, dep jazady Egemen.kz.

Dana MYRZAQADIR

Foto: freepik.com

Quzyrly organ atalǵan buıryq jobasyn talqylaýǵa shyǵardy.

«Suıytylǵan munaı gazynyń bir tonnasy úshin shekti kóterme baǵa 45 158 teńgeni quraıdy (buryn – 40 320 teńge). Bul rette shekti bólshek saýda baǵasy óńirge baılanysty lıtrine 5-ten 8 teńgege deıin azdap ósedi», delingen mınıstrlik habarlamasynda.

Vedomostvo suıytylǵan gaz baǵasyn kóterýge túrtki bolǵan máselelerdi atady.

Búgingi tańda suıytylǵan munaı gazynyń baǵasy ony óndirýdiń ózindik qunynan áldeqaıda tómen. Osylaısha suıytylǵan munaı gazy (SMG) óndirisiniń ózindik quny tonnasyna 60 myńnan 70 myń teńgege deıin ózgeredi. Al óńdeýshi zaýyttar úshin qoldanystaǵy shekti kóterme baǵa tonnasyna 40 320 teńgeni quraıdy. Osylaısha óndirilgen árbir tonna gazdan zaýyttar 20-30 myń teńge kóleminde shyǵynǵa ushyraıdy.

Jyldan jylǵa SMG tutyný kólemi kúrt ósip jatyr. О́tken jyldyń ózinde Qazaqstanda tutyný 2022 jylmen salystyrǵanda 400 myń tonnaǵa nemese 28%-ǵa ósti. Máselen, 2023 jyly SMG tutyný kólemi 2,2 mln tonnany qurady (2022 jyly 1,8 mln tonna). Qazirgi tańda tapshylyq deńgeıi shamamen 20-25 %-ǵa jetedi.

Qazaqstandaǵy SMG eń tómen baǵalar aımaqqa baılanysty – 54-ten 86 teńge aralyǵynda. О́zge eldermen salystyratyn bolsaq, bul tómen soma. Máselen, Reseıde bir lıtr gazdyń baǵasy - 132 teńge, Ázerbaıjanda – 171 teńge, Tájikstanda – 273 teńge. Sarapshylardyń boljamyna qaraǵanda, 2024 jyly ishki naryqta tutyný kólemi taǵy 200 myń tonnaǵa artyp, 2,4 mln tonnaǵa jetedi. Bul jaǵdaıda gaz tapshylyǵy 30-40%-dy quraýy múmkin.