Bıylǵy kóktemde Atyraý qalasynda ótken Ulttyq quryltaıdyń úshinshi otyrysynda el Prezıdenti Qasym-Jomart Toqaev jastardy kitap oqýǵa shaqyryp, óner-bilimniń qajettiligin erekshe atap ótken bolatyn.
Memleket basshysynyń bastamasyn qoldaý maqsatynda Mádenıet jáne aqparat mınıstrligi «Aýyl kitaphanalaryna 100 kitap» áleýmettik aksııasyn jarııalady. Bastama kóptegen memlekettik uıymnyń tarapynan qoldaý tapty. Solardyń biri – Batys Qazaqstan oblystyq polısııa departamenti.
Jaqynda departament basshysy, polısııa polkovnıgi Arman Orazalıev jazýshy Muqades Eslamǵalıuly atyndaǵy Syrym aýdandyq ortalyqtandyrylǵan kitaphana qoryna 100 kitap tartý etti. Buǵan deıin de 335 myń kitap qory bar rýhanııat oshaǵy túrli janrdaǵy jınaqtarmen baıı tústi.
Búgin biz «Aýyl kitaphanalaryna 100 kitap» atty áleýmettik aksııaǵa óz úlesimizdi qosyp otyrmyz. «Alash» tarıhymen tikeleı baılanysty bul eldi meken – tarıhı tulǵalar shoǵyry shyqqan qasıetti de taǵylymdy topyraq. Búgin kitaphana qoryna tapsyrylyp otyrǵan bul kitaptar óz oqyrmanyn tabatynyna senimdimiz. Jastar arasynda kitap oqý mádenıetin nasıhattaý jolyndaǵy jumystaryńyz jemisti bolsyn», dedi Arman Moldııaruly.
Kitaphanada ótken kezdesýge arnaıy kelgen Syrym aýdanynyń ákimi Jumageldi Batyrnııazov ta aýdan turǵyndary atynan departament bastyǵyna rızashylyǵyn bildirip, Alǵyshat tartý etti. Is-sharaǵa qatysqandar saıası qýǵyn-súrgin qurbandarynyń eskertkishine gúl shoǵyn qoıdy. Jaqynda jańa ǵımaratta jańaryp ashylǵan aýdandyq murajaı jádigerlerimen tanysty.
Batys Qazaqstan oblysy
