Foto: primeminister.kz
Kezdesýde Almaty oblysynda «Lays» qytyrlaq kartoptary sekildi tuzdy jeńil taǵamdar óndiretin zaýyt salý jobasy talqylandy. Búgingi tańda snekter shyǵaratyn tolyqqandy jańa zaýytqa $160 mln kólemindegi sheteldik jeke ınvestısııa bólindi.
Zaýytty 2026 jyly iske qosý kózdelgen, ol jylyna 16 myń tonnaǵa deıin daıyn ónim shyǵarady dep josparlanyp otyr, 2027 jyldan bastap 21 myń tonnaǵa deıin ulǵaıtylady. Daıyn ónim Ortalyq Azııa naryǵyna jáne odan tysqary jerlerge jetkiziletin bolady. Qurylys kezeńine myńǵa jýyq adam tartylady, al jobanyń ózine 350-ge jýyq bilikti mamandarǵa arnalǵan jumys orny ashylmaq.
Davıd Manzını jobany júzege asyrý barysynda kompanııa negizinen jergilikti shıkizatty satyp alýǵa nıetti ekenin aıtty. Qazaqstandyq fermerlermen kartoptyń synaqtyq partııalaryn jetkizýge kelisimsharttar jasasý boıynsha jumys júrgizilip jatyr. 2026-2030 jyldary 50-66 myń tonnaǵa jýyq kartop satyp alý, keıinirek kólemdi odan ári ulǵaıtý josparda bar. Prosesterdiń tehnologııalyǵyn eskere otyryp, joǵary qaıta óńdeý deńgeıi qamtamasyz etiledi, al jańa ozyq ádister ekologııalyq turaqtylyq qaǵıdattaryna sáıkes kelýge múmkindik beredi. Osylaısha, jańa zaýyttyń qaldyqtary 100% qaıta óńdelip, kádege jaratylatyn bolady.
Kompanııa jobany qysqa merzimde iske asyrýǵa múddeli. Qazaqstanda qurylǵan qolaıly ınvestısııalyq ahýal qazirdiń ózinde jobany damytýdyń kelesi kezeńderin pysyqtaýǵa múmkindik beredi. Keıin PepsiCo ónimderdiń basqa da kóptegen túrin shyǵarý úshin zaýytty jańǵyrtýǵa taǵy da ınvestısııa salady.
Úkimet basshysy Oljas Bektenov bul jobanyń aýyl sharýashylyǵyn damytý, otandyq sharýalardyń tabysyn arttyrý jáne jalpy alǵanda ekonomıkany nyǵaıtý úshin mańyzdylyǵyn atap ótti. Jobanyń azyq-túlik ónerkásibi men AО́K úshin mańyzdylyǵymen qatar, zaýyt qurylysy irgeles kólik, logıstıka, aýyl sharýashylyǵy ónimderin qaptaý jáne qaıta óńdeý salalaryna mýltıplıkatıvti áser etedi.
«AQSh – Qazaqstannyń mańyzdy ınvestısııalyq seriktesteriniń biri. Qazaqstan PepsiCo sekildi strategııalyq ınvestorlarmen uzaqmerzimdi yntymaqtastyqqa múddeli. Biz ınvestısııalardy qorǵaý boıynsha mindettemelerdi saqtaımyz jáne qajetti qoldaý kórsetýge daıynbyz», dep atap ótti Oljas Bektenov.
Zaýyt Úkimettiń erekshe baqylaýyndaǵy basym ınvestısııalyq jobalar pýlyna engizilgen. Jalpy, osy jyldyń birinshi toqsanynyń qorytyndysy boıynsha pýl 122,5 myń jumys ornyn ashatyn, 32 trln teńgeni quraıtyn 704 jobadan turady.
Kezdesý qorytyndysy boıynsha taraptar Qazaqstannyń azyq-túlik áleýetin arttyrýǵa yqpal etetin jańa jobalardy júzege asyrý boıynsha ózara is-qımyldy keńeıtý jáne uzaqmerzimdi yntymaqtastyqty qurý nıetin rastady.
