Sońǵy bes jylda Memleket basshysynyń elde sátimen saıası reformalar júrgizip, «Ádiletti Qazaqstan» qaǵıdatyn eldik ıdeologııanyń arqaýyna aınaldyrýy, ulttyń qasterli uǵymdary men álemdik qundylyqtardy teń ustaýy – damýymyzdyń jańa baǵdaryn aıqyndady. 2019 jáne 2022 jyldaǵy prezıdent saılaýy, sońǵy eki jyl ishinde júrgizilgen saıası jáne konstıtýsııalyq reforma, sonyń aıasynda balalar bolashaǵyn berik etýge hám jurtshylyq ál-aýqatyn kóterýge baǵyttalǵan tyń turpatty qos qordyń («Ulttyq qor – balalarǵa», «Qazaqstan halqyna») aıaq alysy, shetel asqan aktıvter men zańsyz jekeshelendirilgen 5 mıllıon gektar jerdiń memleketke qaıtýy halyq senimin arttyrdy. Munyń syrtynda ádilettiktiń mazmuny syndy el tutastyǵy, qalyń qaýym únin tyńdaýǵa jumylǵan bılik betburysy, zań men tártiptiń qatańdyǵy, «kúshti prezıdent – yqpaldy parlament – esep beretin úkimet» birligi, eshqashan eskirmeıtin «adal azamat» qundylyǵy jańa ıdeologııalyq tuǵyrnama retinde ornyqty. Konstıtýsııalyq sot, Parlament quzyretiniń artýy, aýyl, aýdan, qala ákimderiniń izashar saılaýy, muǵalim men dáriger qaýymynyń jalaqysynyń artýy, osy saladaǵy tyń jobalar («Jaıly mektep», «Aýylda densaýlyq saqtaýdy jańǵyrtý», t.b.) – eleýli bastamalar. Áleýmettik zárýlikterdiń oraıly sheshilýine jańa Parlamenttiń belsendiligi men iskerligi, bılik pen qoǵam arasyndaǵy altyn kópir – Ulttyq quryltaı da tyń serpin bergendeı.
Memleket basshysy Atyraýda ótken Ulttyq quryltaı jıynynda memleket te, qoǵam da temirqazyq eter jalpyulttyq alty qundylyq júıesin aıqyndap berdi. Bul halqymyzdyń «Altaý ala bolsa, aýyzdaǵy ketedi» degen rámizdi naqylyna dóp keledi. Táýelsizdik pen otanshyldyq, birlik pen yntymaq, ádildik pen jaýapkershilik, zań men tártip, eńbekqorlyq pen kásibı biliktilik, jasampazdyq pen jańashyldyq – endi tek bıik pálsapalyq termın kúıinde qalmaı, halyqtyń bolmysyna, qasıetine aınalýy kerek. Memleket basshysynyń ádilettilik qaǵıdatynyń basty mazmuny da, muraty da osynda!
Halqymyz «Qater taban astynda» deıdi. Sońǵy bes jylda Arys pen Jambyl áskerı qoımasyndaǵy jarylys, shekara syrtynan sansyratqan Sardoba, álemdik pandemııa derti, Ekibastuz JES-nyń tótenshe jaǵdaıy, Qostanaı men Semeı ormandaryndaǵy órt, keshegi batys jáne soltústik óńirlerdegi tasqyn sý, t.b. tabıǵı-tehnogendik oqıǵalar qansha kúrdeli bolsa da, bizdiń eldigimiz ben birligimizdi synady. Aýyr kúnderde qıyndyqqa tap bolǵan óńirlerge Prezıdenttiń ózi bas bolyp baryp, qamyqqan jurtshylyqtyń kóńilin demdedi jáne shuǵyl qalpyna keltirý jumystarynyń jón-jobasyn sheshti. «Ár nárseniń qaıyry bar» degen. Osy synaqtan soń, halyqtyń Prezıdentke senimi odan saıyn arta tústi. Baspanasyz qalyp, birer aı ishinde páter kiltine qol jetkizgen Soltústik Qazaqstan, Qostanaı, Aqtóbe, Batys Qazaqstan, Aqmola óńiri turǵyndarynyń alaýlaǵan júzinen ádiletti shyn sezingenin ańǵaramyz. Kúzge salym bul qýanysh áli eselenedi.
Memleketimizdiń syrtqy saıasatyna kelsek, álemde geosaıası teketires, soǵys pen qaqtyǵys órship, dúnıeniń úılesim shańyraǵy qaq bólinip ortaǵa túsken bes jylda Qazaqstan qaýipsizdik, el men jer tutastyǵy, ekonomıkalyq óris pen ınvestısııa tartý baǵytynda qaǵıdatty jolynan aınymady. Qasym-Jomart Kemeluly Sıngapýr dárisinde jahandyq syn-qaterdi bylaı túsindirdi: «Qyrǵı-qabaq soǵystan keıin ornaǵan «beıbitshilik nesibesi» túgesilýge jaqyn. О́ıtkeni byltyr álem elderiniń áskerı salaǵa jumsaǵan shyǵyndary 2,2 trıllıon dollarǵa deıin jetti. Bul – rekordtyq kórsetkish. Demek qarýlanýdyń jańa básekesi bastaldy». Budan shyǵar jol qaısy? Prezıdent ony da aıtty: «Dúnıejúzimen ashyq qatynas jasaı otyryp, biz syrtqy syn-qaterlerge qarsy kúreste qyraǵylyq tanytyp, proaktıvti túrde áreket etemiz. Qazaqstannyń zańdy quqyqtary men maqsatyn qorǵaý isinde tartynyp qalmaımyz, elimizdiń basty múddesin qurban etýge eshqashan jol bermeımiz», dedi.
Bul halqymyzdyń «Aınalańdy dospen qorsha!» degen danalyǵyna sáıkes keledi. Prezıdentimiz 2019–2023 jyldary BUU Bas assambleıasynyń tarıhı sessııalarynda óńirlik turaqtylyqtyń jańa modeli men osy halyqaralyq uıymdy reformalaýǵa qatysty tyń ıdeıa kóterdi. Búginde álemdik kún tártibiniń dilgir jıyndarynda Qazaqstan iltıpatpen atalatyn boldy. 2024 jyly nemistiń áıgili SWP ǵylymı ortalyǵy bizdiń eldi álemdik úılesimge sebepshi 12 «orta derjava» qataryna qosty. Bul – mańdaı ter men jaýapkershiliktiń kórsetkishi.
Kúni keshe Qazaqstanǵa arnaıy kelip, elaralyq ekonomıka men ınnovasııany damytýǵa múddeli ekenin málimdegen Koreıa Prezıdenti Iýn Sok Iol gazetimizge bergen suhbatynda elge de, Memleket basshymyzǵa da joǵary baǵa bere kele, Q.K.Toqaevpen BUU alańyndaǵy kezdesýin eske aldy. Bizdiń beıtarap saıasatymyz ben jaýapkershiligi joǵary dıplomatııamyz álemdegi túsinistik pen eldegi bereke-birlikke qyzmet etip otyr.
