Máselen, Londonnyń Padıngton aýdanynda ornalasqan Rollıng kópiriniń qyzmeti qarapaıym bolǵanymen, qurylymy ózgeshe.
Aptanyń ár jumasynda segizburyshty bul kópir tóńkerilip jazylady da, júrýge qolaıly keıipke enedi. Bul – onyń basqa kópirlerden basty aıyrmashylyǵy. Al kún sońynda qaıtadan segizburyshqa aınalady. Kópir 2004 jyly Grand-Iýnıon kanalyna júk tasymaldaıtyn kemelerdi ótkizý maqsatynda salynǵan. Avtory – Tomas Hezervık.
Bıiktegi kópir
Eıfel munarasy men Gıza pıramıdasyn qossańyz da, onyń bıiktigi Qytaıdaǵy SıDý kópirine jete almaıdy.
Sonda onyń bıiktigi qansha deısiz ǵoı? Aıtaıyq. Bul kópir jerden 496 metr bıiktikte ornalasqan. Bir qyzyǵy, qurylys kezinde kóterme krandar nemese tikushaqtar emes, zymyrandar negizgi qyzmetti atqarǵan. Hýbeı provınsııasyndaǵy ózen ańǵarynan ótetin kópir 2009 jyly ashylǵan.
Sándi kópir
Ońtústik Koreıada ornalasqan Banpo kópiri 1982 jyly salynǵan, alaıda 2007 jyly sol aımaqty jańartý jobasy qurylyp, 2009 jyly tolyq paıdalanýǵa beriledi. Al onyń sánin keltirip, ataǵyn aspandatyp turǵan – kópir janyndaǵy sýburqaqtar.
Sýburqaqtar 1 mınýt ishinde 190 tonna sý tógedi. Keshke 10 myń túrli tústi sham kempirqosaq sekildi jarqyraıdy. Ártúrli sýretke ózgerip, tipti mýzykaǵa sáıkes qozǵalady. Kópir sulýlyǵymen ǵana emes, ekologııalyq tazalyǵymen de erekshelenedi. Aıta keteıik, 2008 jyly osy kópirdegi sýburqaqtar eń bıik degen atqa ıe bolyp, Gınnestiń rekordtar kitabyna engen.
