Foto:QTJ
Taıjanovtyń aıtýynsha, jaz aılarynda jolaýshylar tasymalyna suranys edáýir artady.
«Munda obektıvti sebepter bar. Birinshi sebep - ınfraqurylymnyń tozýy. Búginde bul kórsetkish 56%-ǵa jetti. Magıstraldyq qozǵalys eskirgen. Biz úshin eń mańyzdy mindet – qaýipsizdikti qamtamasyz etý. Sondyqtan temir jolda, magıstralda jyl saıyn jazǵy kezeńde jóndeý-jol jumystary júrgiziledi», dedi Jánibek Taıjanov.
Basqarma tóraǵasynyń aıtýynsha, 2030 jylǵa qaraı Qazaqstanda eski, tozyǵy jetken vagondardyń barlyǵy esepten shyǵarylýy kerek. Olardyń ornyna jańasyn satyp alý josparlanyp otyr.
Eger qajetti poıyzǵa bılet joq bolsa, jolaýshylarǵa kezekke turýǵa keńes beriledi. 2023 jyly bul qyzmetti 170 myńǵa jýyq jolaýshy paıdalanyp, keıin bıletterdi satyp alý múmkindigin aldy.
Jánibek Taıjanovtyń paıymynsha, poıyzdardyń keshigýine bıyl Qazaqstanda bolǵan aýqymdy sý tasqyny da sebep boldy.
«Bıylǵy aýqymdy sý tasqynyna temirjol tótep berdi, eshqandaı máseleler bolǵan joq, biraq sý tasqynynan keıin kóptegen jol taıǵaq bolyp ketken. Jóndeý jumystary júrgizilip jatyr, osyǵan baılanysty jolaýshylar poıyzdary keshigip jatyr», dep túıindedi Taıjanov.
Qyrmyzy JUMAǴALIQYZY,
