Foto: azh.kz
UBT bastalǵaly beri talapkerlerdiń 76%-y shekti baldy jınady. Ortasha balǵa keletin bolsaq, ol 68 baldy qurady. Eń joǵary ball – 138, 8 adam 137 ball jınady.
Qazirgi tańda testke qatysýshylardyń basym bóligi, atap aıtqanda, 18%-y «Matematıka-Fızıka», 16%-y «Bıologııa-Hımııa» pánder kombınasııasyn tapsyrdy. 15%-y «Shyǵarmashylyq emtıhan» kombınasııasyn tańdaǵan.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa bes aptanyń ishinde 577 talapker qatysty.
Osy aptada joǵary oqý oryndarynyń qabyldaý komıssııasy óz jumystaryn bastap, 25 tamyzǵa deıin oqýǵa túsýge qujattardy qabyldaıdy. Sondaı-aq «Pedagogıkalyq ǵylymdar» jáne «Densaýlyq saqtaýǵa» túsýshiler úshin mindetti bolyp tabylatyn emtıhandar bastaldy.
Joǵary oqý oryndary 10 tamyzǵa deıin shyǵarmashylyq emtıhanǵa qatysý úshin ótinishterdi qabyldap, emtıhandardyń ózin 7 shilde men 15 tamyz aralyǵynda ótkizedi. Grant konkýrsyna qujattardy qabyldaý 13-20 shilde aralyǵynda, al tótenshe jaǵdaı jarııalanǵan 6 oblysta (Aqtóbe, Atyraý, Batys Qazaqstan, Qostanaı, Aqmola, Soltústik Qazaqstan oblystary) 13-24 shilde aralyǵynda júzege asyrylady.
Búgingi tańda 396 ereje buzýshylyq anyqtaldy. Onyń ishinde 267 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 120 adam shyǵarylyp, nátıjeleri joıyldy. Beınejazbalardy tekserýden soń ereje buzǵan 9 adamnyń nátıjesi joıyldy. Bógde tulǵalar anyqtalǵan joq.
Aıta ketsek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda oqýǵa túsýshiniń UBT nátıjeleri joıylady.
