Basqosýdyń basty maqsaty – uıymǵa qatysýshy elderdiń memlekettik qyzmettegi adamı resýrstardy basqarý salasynda tájirıbe almasý jáne ózekti máselelerdi talqylaý.
Is-sharaǵa agenttik tóraǵasy Darhan Jazyqbaı, Túrki memleketteri uıymynyń bas hatshysy Kýbanychbek О́mirálıev, Túrkııa Respýblıkasy Prezıdenti janyndaǵy Adamı resýrstardy basqarý keńsesiniń prezıdenti Salım Ataı, О́zbekstan Respýblıkasynyń Memlekettik qyzmetti damytý agenttiginiń dırektorynyń birinshi orynbasary Amırtemırhon Mýsaev, Ázerbaıjan Respýblıkasynyń Memlekettik emtıhan ortalyǵynyń dırektorlar keńesi tóraǵasynyń orynbasary Bahram Halılov, Ázerbaıjan Respýblıkasynyń Prezıdenti janyndaǵy Memlekettik basqarý akademııasynyń rektory Ýrhan Alakbarov, Qyrǵyz Respýblıkasynyń Prezıdenti janyndaǵy Memlekettik basqarý akademııasynyń prorektory Ýrmat Amanbaev, sondaı-aq ortalyq memlekettik organdardyń apparat basshylary qatysty.
MQIA tóraǵasy Darhan Jazyqbaı jahandaný jáne jedel tehnologııalyq úderis jaǵdaıynda ulttyq jáne halyqaralyq deńgeıdegi básekege qabilettiliktiń negizi – adam kapıtalyna erekshe kóńil bólýdiń mańyzdylyǵyna toqtaldy.
– Memleket basshysy Túrki memleketteri uıymynyń kezekten tys sammıtinde elderimiz saıası, ekonomıkalyq jáne mádenı yqpaldastyqty jańa deńgeıge kóterýi qajet dep aıtqan bolatyn. Sondyqtan biz úshin Túrki áleminiń ekonomıkalyq, mádenı jáne áleýmettik salalardaǵy úılesimge umtylysyn eskere otyryp, memlekettik qyzmettegi HR salasynda da utymdy sharalar qabyldaýdyń mańyzy erekshe. Bizdiń maqsatymyz bir – ol memlekettik qyzmette adam resýrstaryn basqarýdyń kúshti ári úılesimdi júıesin qurý, – dedi Darhan Jazyqbaı.
Búginde Qazaqstanda memlekettik qyzmetti jańǵyrtýda HR quraldaryn qoldanýǵa basymdylyq berilip, talantty jastardy jáne jeke sektordan kásibı mamandardy tartýdyń jańa tetikteri engizilip keledi. Biliktiligi men salalyq tájirıbesine sáıkes kásibı mamandar men daryndy basqarýshylardy jekelegen joǵary laýazymdarǵa, al joǵary oqý oryndarynyń grantpen bitirgen úzdik túlekterin aýdandyq jáne aýyldyq deńgeıdegi laýazymdarǵa konkýrssyz taǵaıyndaý, «kelisimsharttyq qyzmetshi» retinde salalyq mamandardy naqty jobalardy iske asyrýǵa tartý múmkindikteri berilgen.
Sıfrlyq transformasııa aıasynda «e-Qyzmet» júıesinde iske qosylǵan memlekettik qyzmetke irikteýdiń jańa formaty Qazaqstan azamattaryna konkýrstarǵa onlaın túrde qatysýǵa jol ashty. Sıfrlyq irikteý júıesin odan ári jetildirý maqsatynda agenttikpen jasandy ıntellekt quraldaryn qoldaný máselesi zerdelenip jatyr.
Jıynǵa qatysýshylar Qazaqstannyń memlekettik qyzmetti jetildirý baǵytyndaǵy qadamdaryn oń baǵalap, ózgerister dáýirinde adamı kapıtaldy damytýǵa qatysty ózekti oılary men ozyq tájirıbelerin ortaǵa saldy. Ázerbaıjanda testileý quraldaryn keńinen qoldaný, Qyrǵyzstanda memlekettik qyzmetshilerdiń sıfrlyq saýatyn arttyrý, Túrkııada úzdiksiz oqytý júıelerin ilgeriletý, О́zbekstanda baǵalaý tetikterin jańartý jumysy alǵa qoıylǵandyǵy jóninde aıtyldy.
Kezdesý sońynda qatysýshylar búgingideı basqosýdyń memlekettik qyzmettegi adamı resýrstardy basqarý boıynsha tájirıbe almasýdaǵy, úzdik sheshimderdi ázirleýdegi mańyzyn erekshe atap, odan ári yntymaqtastyqty nyǵaıtýǵa nıetti ekenderin bildirdi.
